الحب الحقيقي عند الرجل |
كتبت: إيمان توفيق
معني الحب
خلال المقال المقدم من كوكب الإعلام نتعرف علي معني الحب والرومانسية الحقيقية. حيث تعتبر أكتر المشاعر الإنسانية اللي بنهتم بيها وبنفضل طول حياتنا بندور عليها، هي مشاعر الحب، بتحس بيه ناحية شخص معين لأنك شوفت فيه الصورة اللي راسمها لنفسك وبتتمناها، مابتبقاش عارف السبب بالظبط لحبك للشخص ده بس كل اللي أنت عارفه إنك حبيت، و بتكلم طبعا عن الحب الحقيقي، اللي بينتج عنه علاقة صحية يكون كل طرف فيها عايز يدي الطرف التاني من غير مايستنى ياخد.فبالتالي بتلاقي إن كل واحد بياخد حقوقه كاملة، هو ده الحب اللي بيخليك عايز تشوف الحد ده 24 ساعة، بتحس إن جواك طاقة تعمل أي حاجة، بتحس إنك مقبل على الحياة، حاسس بقيمتك، عايز الإنسان ده يكون معاك في كل تفاصيل حياتك، بيكون وجوده بيعوض غياب الكل و وجود الكل مابيعوضش غيابه، ولو أنت بطبعك شخص مابتحبش تتكلم كتير هتتفاجئ إنك معاه بقيت شخص رغاي، لأنك حاسس معاه إنك في منطقة الأمان بتاعتك.
الحب الحقيقي عند المرأة |
الجانب الآمن
منطقة الأمان هي المنطقة اللي بتتكلم فيها من غير ماتحسب لكل كلمة قبل ماتقولها، بتكون عارف إنك هتتقدر وتتفهم مهما حصل، بتكون عارف إنه مش هيحكم عليك، و عارف إن الشخص ده هيفضل يختارك لو من بين مليون شخص وهيفضل شايفك حاجة كبيرة ومقدرك، وهيكون مش شايف غيرك ولا عايز يشوف غيرك، فبتبقى مستعد قدام كل اللي بيعملهولك ده إنك تديله عينيك، بتبقى حاسس إنك عايز تجيبله هدية كل 5 دقايق من كتر ما أنت بتحبه وعايز تدي وتعبر عن حبك طول الوقت.
الحب الحقيقي مفيهوش خوف إنك تصحى في يوم تلاقي الشخص ده مشي، ومابقاش موجود في حياتك فجأة من غير مايتكلم معاك ولا يقولك إنه هيبعد، مابتبقاش حاسس إنك عايز تكدب لأنك حتى لو عملت حاجة غلط وضايقته فأنت مش عايز تكدب ولا تخبي عليه حاجة، وهتفضل دايما تختار إنك تقوله كل حاجة بصراحة.
الحب الحقيقي في الإسلام |
من سمات الحب الحقيقي
هتحس مع الحب الحقيقي إنك مش عايز حاجة تاني خلاص، وإن ده من أحلى الأرزاق اللي ممكن ربنا يرزقك بيها، فيه ناس بتفضل تدور علي الحب طول عمرها ومش بتلاقيه غير متأخر، من وجهة نظرهم إنه متأخر وفيه ناس بيكون قدرها تختار غلط؛ عشان لما يجي الحب الحقيقي تعرف قيمته وتمسك فيه، فيه ناس للأسف بتعيش وتموت من غير ماتلاقيه خالص.
الحب اللي بجد رزق كبير من ربنا بيجي في الوقت اللي ربنا شايفه مناسب، بيعوضك بيه عن كل الوحش اللي شوفته في حياتك، ورغم إن الحب في عصرنا ده للأسف فقد قيمته لأن بقت فيه ناس بتستغل ناس تانيه باسم الحب وهم مايعرفوش أي حاجة عنه، و فيه ناس بقت بتمثل إنها بتحب، بس برغم كده فالحب هيفضل بقيمته، هيفضل من أسمى المشاعر الإنسانية اللي ربنا خلقها،عيش بحُب، حب نفسك أولاً وقدرها بس من غير تكبر، حب اللي يستاهلوا إنك تحبهم، ولما تقابل شريك حياتك اتأكد الأول إن حبه ليك حب حقيقي قبل ماتدي مشاعرك بالكامل وتتصدم في النهاية.
اقرأ أيضا : مواهب الرسم على السوشيال ميديا