كتبت: ايمان توفيق
الكدب مالوش رجلين :
في بداية حياتنا لو اتربينا في بيت مش بيتعامل بمبدأ الكدب، بنتعلم الصراحة، و إننا مانكدبش مهما حصل، وبنطلع نتعامل مع الناس علي الأساس ده، وبنتوقع منهم بردو إنهم مابيكدبوش زينا، وبنمر بموقف ورا التاني وفجأة نكتشف إن فيه موقف معين اتقال فيه كلام غير الحقيقة، والموضوع بيبدأ بالمواقف الصغيرة بتاعة الأطفال، زي إن ممكن المدرس بتاعك لما يسأل مين اللي اتكلم وأنا بشرح، تلاقي صاحبك بيشاور عليك وبيقوله هو ده اللي اتكلم مع إنك ما اتكلمتش ولا حاجة، أو مثلا حاجة تتسرق فواحد يقول إن أنت اللي سرقتها مع إن ممكن يكون هو اللي سارقها أساسا.
كل دي مجرد صدمات صغيرة بتكتشف من خلالها إن مش كل الناس اتربت علي الصراحة، وإن فيه ناس بتكدب عادي، وإن مش كل اللي بيحلف بربنا صادق، لا فيه ناس بتحلف كدب عادي، وبنمشي في الحياة، ونكتشف حاجات وبنعرف ناس وبعد شوية وقت بنثق فيهم لحد ماتتفاجئ في مره إن صاحبك الأنتيم كان بيكدب عليك في كل حاجة بيقولهالك.
أو إن الإنسان اللي بتحبه مكانش بيحبك، وكان بيتسلي بيك بس، أو إن صاحبتك اللي بتعشقيها دي بتطعنك في ظهرك، وبتحاول تأذيكي وتاخد خطيبك منك، ولما بنكتشف إن فيه شخص كدب علينا في حاجة تلقائيا عقلنا بيحصلوا ايرور، وبنشك في كل الذكرايات اللي حصلت، ومش بنبقي عارفين إيه اللي كان صح وصدق وإيه اللي كان غلط.
الكدب حرفيا من أسوأ الصفات، الكدب قادر يدمر الثقة، يقتل الحب والصداقة، الكدب كمان من صفات المنافقين واتقال فيه الحديث ده ..
ليه الناس بتكدب :
لو جينا نفكر في السبب الأساسي للكدب هنلاقي سببه الخوف، خايفين يحصل مشكلة، خايفين نتعرض للوم أو انتقاد، خايفين من العقاب، وبنعتقد إن الكدب هينجينا لكن ده غلط جداً وعلي رأي المثل، الكدب مالوش رجلين وبيتكشف، والكدبة مابتبقاش كدبة واحدة بس لا، الكدبة بتجر كدب كتير وراها، وتتألف حكاية كبيرة بالكدب، ماتعرفش تصلحها فالصدق دايما نجاة، ربنا بينجيك عشان اخترت تقول الصراحة.
لو بتكدب كتير راجع نفسك، حل أساس المشكلة اللي هو الخوف اللي بيخليك تكدب؛ لأن مفيش حد يستاهل إننا نرتكب ذنب واحد؛ عشان خايفين منه واعرف إنك لما تمشي صح هتلاقي أمورك بتتحل من حيث لا تدري .
في التربية اخلقوا مجال من الصراحه والأمان بينكم وبين أولادكم، وخليكوا صحابهم، طمنوهم إنهم يقولوا الحقيقة، عودوهم مايكدبوش لأي سبب، وطبعا لازم البداية تبقى من عندكم، أنتم قدوتهم، ماينفعش تكدبوا قدامك وتطلبوا منهم مايكدبوش، ماينفعش تقوله رد علي التليفون وقوله إن أنا نايم مثلا؛ افتكروا دايما إن البداية بتبقى من عندكم.