![]() |
ماذا بعد امتحانات الثانوية العامة ؟ |
كتبت : إيمان توفيق
الثانوية العامة قربت تخلص وبعدها هيفضل دماغك مشغول بالنتيجة و هتلاقي في دماغك ألف سؤال سوف يناقشهم كوكب الإعلام.
ماذا بعد امتحانات الثانوية العامة :
بعد ما تخلص الثانوية العامة ممكن ماتعرفش تستمتع بالإجازة بشكل كبير؛ لأنك هتبقى مشغول بكمية رهيبة من الأسئلة اللي بتدور في دماغك ومش مريحاك زي إنك بتفضل تسأل نفسك ياترى هجيب كام في الثانوية العامة؟ طب هل هوصل لحلمي ولا لا؟ هل تعب السنة والضغط ده كله هيجي بنتيجة بتمناها ولا هيكون ده كله راح على الفاضي؟ ، طب هيبقى شكلي إيه لو مجبتش مجموع حلو في الثانوية العامة ودخلت الكلية اللي نفسي فيها دي؟، هعمل إيه طيب في حياتي لو مدخلتش الكلية دي، ده أنا مكانش عندي أحلام ولا خطط تانية غيرها؟ يا شماتة الناس اللي مش عايزالي الخير فيا لو مجبتش مجموع حلو.. وهكذا بتفضل في الدوامة دي لحد يوم نتيجة الثانوية العامة و ساعتها يا بتطمن وتفرح وتحس الدنيا مش سايعاك من الفرحة يا بتكتئب وتحس إن أحلامك كلها اتدمرت لما تلاقي نفسك ماجبتش المجموع اللي كنت بتحلم بيه وإن حلمك بقى بعيد أوي عنك.
الجانب المتفائل واضح بس إحنا هنتكلم في الجانب اللي قالقك لأن ده المهم دلوقتي ولما بتواجه مخاوفك بتبطل تخاف تعالى نسأل السؤال اللي أنت خايف منه..
اقرأ أيضا: انتحار ربة منزل بسبب أن نجلها رسب في امتحانات الثانوية العامة
ماذا لو مجبتش المجموع ومدخلتش الكلية اللي نفسك فيها؟
تمام نفترض إنك صحيت من النوم يوم نتيجة الثانوية العامة و لقيت نفسك مجبتش المجموع ، طبيعي ساعتها هتحزن أوي و هتحس إن أحلامك كلها اتدمرت وخلاص الدنيا وقفت بس الحقيقة إن حتى لو ده حصل فأنت ساعتها هتبقى باصص تحت رجلك مش هتكون شايف ما وراء الحاجة اللي حصلت دي؛ لأن إحنا عندنا قصر نظر في الحياة مش بنشوف الخير من ورا الحاجة اللي بتحصل، ممكن تفكر إن كلمة خير دي كلام محفوظ وعادي ، بس الحقيقة إن أنت كان ممكن توصل لحلمك و ماتنجحش فيه وتكتشف إنه كان أكبر بكتير من قدراتك فتزعل أكتر وتحس إنك قليل وفاشل.
أو كان ممكن تدخل وتنجح بس يجيلك من وراه شر كبير زي إنك تقابل ناس في الكلية دي يبوظوا نفسيتك أو أخلاقك في حاجة، ممكن كنت تقابل حد فيها وترتبط بيه و يكرهك في حياتك، أو تتخرج منها وساعتها يكون الشغل اللي له علاقة بالمجال ده مبقاش موجود، فتحس إنك عافرت كل السنين دي على الفاضي أو يكون قربك من حلمك ده هيبعدك عن حاجة تانية أهم.
كون إن أنت ماتوصلش لحلمك فده معناه إن فيه طريق أنسب بيتفتحلك، فيه حاجة ممكن تلاقي نفسك فيها أكتر وتنجح فيها أكتر بس أنت لسه ماشوفتهاش، نتيجتك في الثانوية العامة مش هي مقياس المستقبل ومش بتقف عليها حياتك، وسعيك ما راحش على الفاضي ولا حاجة ربنا شاف تعبك ومجهودك وهيعوضهولك في حاجة تانية أحسن أنت لسه مش عارفها بس أنت اصبر و ماتحطش نتيجة الثانوية العامة عائق بينك وبين حياتك الجاية ، كمل وعافر إنك تشوف الحكمة والخير من ورا اللي حصل وتشوف حلم تاني أنسب و أحلى ده حتى الأحلام مش بتخلص ولا إحنا ينفع نبطل نحلم.
اقرأ أيضا: أماكن تلقي خدمات التنسيق بمرحلة تقليل الاغتراب
الأسئلة :
ما هو موعد انتهاء الامتحانات للصف الثالث الثانوي؟
تنتهي اختبارات الثانوي العام في يوم ١٣/ ٧.