![]() |
الشجرة القاتلة .. شجرة المنشينيل |
كتبت : ايمان توفيق
ممنوع الاقتراب ⚠️ شجرة المنشينيل تهدد حياتك :
" تجنب ملامسة أي جزء من أجزاء هذه الشجرة " دي جملة تحذيرية كتبت علي لوحة مثبته في الأرض قدام شجرة موجودة في جزيرة توباكو الكاريبية، لو شوفت اللوحة دي فأنت هيجي في بالك للحظة إن أكيد الجملة اللي كتب الجملة دي هو صاحب المزرعة اللي موجودة فيها الشجرة عشان يحافظ عليها من أي حد يفكر يسرق ثمارها، بس الحقيقة إن التحذير ده ماتكتبش عشان يحمي ثمار الشجرة ولا حاجة، هو اتكتب عشان يحمي حياة الناس نفسهم، و الخطر مش بيكمن بس في مجرد لمس الشجرة، لا هو بمجرد ما حد يقف تحتها أو يقرب من المنطقة اللي موجوده فيها فده كفيل يسببله مصائب كبيرة، و في الموضوع ده من كوكب الاعلام هنعرف ليه الشجرة دي خطيرة جدا كده وإيه أصلها.
![]() |
ممنوع الاقتراب .. شجرة المنشينيل تهدد حياتك |
خطورة الشجرة القاتلة :
في عام 1999 م راحت أخصائية الأشعة نيكولا ستريكلاند تقضي إجازة في جزيرة توباكو الكاريبية والجزيرة دي جمالها خلاب وكأنها جنة وده عشان بتتميز بشواطئ خلابة برمال بيضا و نخيل متمايل بالإضافة إلى البحر بلونه الفيروزي الجميل وكل ده بيجتمع عشان يظهر في منظر خلاب من صنع الخالق سبحانه وتعالي، لكن اللي حصل مع نيكولا في صباح اليوم الثاني من وصولها للجزيرة خلي اجازتها تتحول لجحيم وحرمها من الاستمتاع بكل الجمال ده.
![]() |
خطورة شجرة المنشينيل |
![]() |
جزيرة توباكو الكاريبية |
تناول ثمار مجهولة كان أشبه بجحيم :
لما كانت نيكولا مع واحد من اصدقائها علي الشاطئ و بيدوروا علي الصدف والشظايا المرجانية، شافت ثمار منتشرة علي الشاطئ، الثمار دي كانت جوز هند و مانجا وفواكه تانية كتير ومن بين الفواكه دي كان في فاكهة صغيره شبه التفاح، و من غير ما تعرف نيكولا الفاكهة دي عبارة عن إيه أو حتي تسأل عنها الأول، أخدها الفضول و أخدت قطمه من الفاكهة دي، في البداية لقت إن طعم الفاكهة حلو جدا لدرجة إن انطباعها عن طعمها شجع صديقها هو كمان إنه يدوقها.
و طعم الفاكهة دي كان قريب من طعم التفاح بالفعل زي ما شكلها قريب منه لكن فجأة اتحول الطعم الحلو ده في فمهم للذعه شديدة و حرقة و كأنهم أكلوا شطة، وبعد شوية بدأت عينيهم تدمع و يحسوا بضيق في الحلق و بالإضافة لظهور تقرحات في الفم و المريء لدرجه إنهم ماكنوش قادرين يبلعوا أي حاجة غير المشروبات و اللي كان بلعها أصلا بيشكل صعوبة عليهم، وكل ما كان بيعدي الوقت كانت الاعراض بتزيد، بالرغم من إنهم أخدوا ادويه عشان تخفف الألم.
و بعد حوالي 8 ساعات من العذاب ده، بدأت الأعراض أخيرا إنها تخف بالتدريج و وقتها قررت نيكولا ستريكلاند إنها تحكي التجربة المخيفة اللي مرت بيها دي و اللي ساقها ليها فضولها اللي خلاها تأكل حاجه متعرفش مصدرها على أمل إنها بكده تكون بتحذر الناس من إنهم يعملوا زيها ويعرضوا نفسهم لخطر كان ممكن يسبب الموت لكن ياتري إيه الفاكهة دي وهل اللي حصل مع نيكولا وصديقها كان نادر ولا هم اللي نجوا من الموت بأعجوبة.
![]() |
أخصائية الأشعة نيكولا ستريكلاند |
ثمار الشجرة القاتلة :
بعد ما نيكولا حكت اللي حصلها للسكان الأصليين على الجزيرة ردوا عليها بسرعة وقالولها انتوا اكلتوا من ثمار شجرة المنشينيل ودي شجره معروفة باسم تفاحه الشاطئ او الجوافة السامه و ده طبعا لأن زي ما قولنا الثمار بتاعتها شبه التفاح والجوافة، وقديما كان الرحالة الإيطالي كريستوفر كولومبوس بيطلق علي الشجرة دي اسم شجره تفاح الموت الصغير ده غير كمان إن اسمها بالإسبانية معناه الحرفي شجره الموت أو الشجرة القاتلة، و النوعية دي من الأشجار بتكون منتشرة في الأجزاء الاستوائية من أمريكا الوسطى وجنوب أمريكا الشمالية و منطقه الكاريبي و بعض الأجزاء من شمال أمريكا الجنوبية ووفقا لموسوعة جينيس، فشجره المنشنيل هي أخطر شجره على وجه الأرض، لأن بالرغم من إن ثمار الشجرة دي رائعة من حيث الطعم والريحة والشكل، إلا إن أقل جرعه منها بتخلي الشخص يواجه كل الاعراض اللي شافتها نيكولا و صاحبها أو أسوأ منها كمان.
![]() |
ثمار الشجرة القاتلة |
![الرحالة الإيطالي كريستوفر كولومبوس الرحالة الإيطالي كريستوفر كولومبوس](https://blogger.googleusercontent.com/img/a/AVvXsEh91NwUWENhFGgAI4KVNKNtugXl8tAmXZL-mts5Bi_CXKBEnj-Rj6ImQkEJ3XzcWrYjfjlTTxxjKkyHzc3eiEkRtP5xgsEkSNSiS_5pEZ0qVXoOBwOOpvO55xgBOjvKsP3Ga9DFz3rYYExCWIqZ7gBYtCBM3m1riVZL9pVHDpy_HCEnH5ojME9rxZNW=w640-h400-rw)
شجرة المنشينيل خطورتها مش في الثمار بس :
و الحقيقة المرة بقا إن الثمار مش هي الخطر الوحيد اللي بتمثله شجرة المنشينيل، لأن كل جزء منها بيعرض الانسان لخطر الموت و بأسوأ الطرق و ده اللي أكده معهد فلوريدا للأغذية لما صرح المسؤولين إن التفاعل مع أي جزء من أجزاء الشجرة دي ممكن يكون مميت، و المصدر الرئيسي لخطورة الشجرة بيجي من إنها بتنتج عصارة لبنيه سامه بتخرج من كل حته فيها من اللحاء و الفروع والأوراق وحتى الفاكهة.
و نقطه واحده بس من المادة اللبنية السامه دي لو لمست جسم أي بني آدم فهي بتسببله حروق و بتسيب وراها قرح وندوب و ألم مالوش حدود بالإضافة لأن العصارة دي لو لمست عين أي انسان فهي بتسببله عمي دائم في نفس اللحظة، فالحقيقة إن الأعراض اللي ظهرت على نيكولا وصاحبها بعد ما أخدوا قطمه من الثمار دي كانت تعتبر اعراض خفيفة لحسن حظهم، لأن المتعارف عليه إن أكل الفاكهة دي بيتسبب في قيء شديد بالإضافة إلى ضيق في الحلق وقرح و التهابات حول الفم و صعوبة في التنفس ونزيف في الأعضاء الداخلية وفي النهاية الوفاة.
وبالرغم إن نيكولا مكنش عندها أي علم بالشجرة دي ولا ثمارها إلا إن السكان الأصليين للكاريبي و فلوريدا كانوا علي علم بيها من مئات السنين، بل و استغلوا خطورتها لصالحهم كمان، وده لانهم اتعودوا يغمسوا السهام بتاعتهم في المادة السامه اللي بتخرج من الشجرة دي؛ عشان يحولوا السهام العادية بتاعتهم لسهام سامة يستخدموها في الحروب، والمستكشف الاسباني "خوان بونثي ديل يون" واللي اسمه كان مرتبط بأسطورة البحث عن ينبوع الشباب اتقتل هو نفسه بسهم مسموم من عصاره الشجرة القاتلة دي، وده حصل لما كان في رحلة لفلوريدا و نشبت حرب وقتها بين قواته و السكان الأصليين و اخد سهم مسمم من عصارة الشجرة القاتلة في رجله، و بالرغم من هروبه من أرض المعركة إلا انه مات في النهاية بتأثير السم عليه.
![]() |
أسطورة البحث عن ينبوع الشباب |
لا تقترب من منطقة شجرة المنشينيل وإلا سيكون هلاكك محتوم :
العجيب بقا إن مش بالضرورة حد يقرب من الشجرة أو يأكل ثمارها أو يلمسها حتي عشان يتحمل عواقبها لو واحد احتمي من المطر تحت الشجرة دي فهو هيكون بيعرض نفسه للمخاطر اللي اتكلمنا عنها سواء العمي او حروق الجلد أو حتي الموت؛ و ده لأن المطر بياخد المادة السامه من فروع الشجرة و اوراقها وينزل بيها علي رأس الشخص اللي واقف تحتها، وحتي لو مكنش محتمي تحتها، فالمياه بتاخد العصارة السامة دي و تنزل بيها حوالين الشجرة يعني حتي اللي واقف بالقرب منها مش تحتها بيكون معرض بردوا لنفس الخطر.
التخلص من شجرة المنشينيل قاتل أيضا :
و لو قولنا طب ما خلاص خلينا بقا نخلص من شرها و أخدنا فروع أو أوراق أو حتى لحاء الشجرة دي و حرقناه فالدخان الناتج عنها هيكون سام بالدرجة الكافية اللي تخليه يسبب العمي للي واقف قريب منه، ناهيك بقا عن استنشاق الدخان نفسه، و كتير من السياح اللي بينزلوا الشواطئ اللي فيها النوعية دي من الأشجار اتعرضوا لإصابات مروعة، خصوصا لما كانوا بيحتموا بيها أثناء المطر، و الأدهى من كده إن مجرد وقوفك بالقرب منها بيعرضك لخطر الاختناق أو الموت، و الريحة النفاذة للشجرة دي بتخلي أي انسان يقرب منها لمده طويله إنه يكون معرض للاختناق نتيجة استنشاقها.
وعلشان كده اتعود المسؤولين و الأهالي إنهم يكتبوا لافتات تحذيريه قدام الأشجار اللي من النوع ده مع التنبيه على خطورة القرب منها أو ملامسه أي جزء من اجزائها، و أحيانا هتلاقي على الشجرة علامه إكس باللون الأحمر و هنا في سؤال بيطرح نفسه اللي هو "ليه حكومة المناطق اللي بتنتشر فيها الأشجار دي ما يتخلصوش منها ويكفوا الناس شرها؟".
أهمية شجرة المنشينيل :
برغم خطورة الشجرة دي إلا إنها بتلعب دور مهم جدا في النظام البيئي في المناطق اللي هي منتشرة فيها؛ لأن جزورها العميقة بتساعد في منع تآكل التربة و السواحل خصوصا على شواطئ أمريكا الوسطى وكمان هي بتعتبر بيت آمن لأحد الحيوانات المحظوظة في عالمنا، و هي الإغوانا المخططة اللي بتعيش في أمريكا الوسطى و الجنوبية و اللي بتعتبر الحيوان الوحيد اللي ربنا سبحانه وتعالى أعطاه مناعة ضد عصارة الشجرة السامة.
![]() |
الإغوانا المخططة |
وفي نهاية الموضوع ده من كوكب الاعلام أحب اقولك، ياريت نحاول نستفيد من درس نيكولا، و ما نقربش من أي حاجه منعرفش مصدرها و أصلها و فصلها خصوصا لو كنا في بلاد اجنبيه ونحاول نسأل علي كل حاجة غريبة ونعرف هي إيه؛ لأن الفاكهة اللي ممكن يكون طعمها وشكلها حلو ممكن تكتشف في النهاية إنها كانت هلاكك المحتوم .
اقرأ أيضا: حيوان بيصطاد بتنويم مغناطيسي
الأسئلة:
ماهي الإغوانا المخططة؟
هي نوع من الزواحف يشبه السحالي وسميت بهذا الاسم نسبة إلى جزر إغوانا اللي موجودة في البحر الكاريبي في أمريكا الوسطى وتأخذ من شجرة المنشينيل بيتًا لها حيث أنها خلقت محصنة ضد عصارات الشجرة السامة.
علي ماذا تتغذي الإغوانا المخططة؟
الإغوانا التي تعيش في شجرة المنشينيل هي كائن عشبي ولذلك تتغذي علي الفواكه و أوراق الشجر والزهور و تعتبر فريسة للطيور.