![]() |
حيوان بيصطاد بتنويم مغناطيسي |
غرائب الحيوانات مش بتنتهي وكل معلومة غريبة نعرفها بنلاقي بعدها المعلومة اللي أغرب منها، وفي المقال ده من كوكب الإعلام هنتعرف على نوع جديد من الحيوانات عنده قدرة غريبة جداً.
"سمكة لسان البحر cuttlefish "
هى اسمها سمكة بس في الحقيقة هى مش بتشبه السمك، هى أقرب للأخطبوط أو الحبار، بتتواجد في المناطق الضحلة الدافئة اللي بتكون موجودة في كل السواحل في العالم ماعدا أمريكا الشمالية و أمريكا الجنوبية، و موجود منها ١٠٠ نوع أحجامهم بتختلف و بتتراوح من ( ٢.٥ سم : ٩٠ سم) وحجمها ده بيختلف على حسب نوعها وكل نوع فيهم مختلف في الشكل عن التاني بس بيتشابهوا إنهم كلهم عندهم ( ٨ أذرع) وبتحتوي الأذرع دي على مجسات و بداخلها ماصات زي الأخطبوط و السمكة بتستخدم المجسات دي في إنها توجههم ناحية الفريسة عشان تسحبها لفمها وتسممها بالمنقار بتاعها؛ عشان تشلها عن الحركة وعلى طول تبلعها.
![]() |
جلدها كهربائي وبتصطاد بتنويم مغناطيسي |
جلدها كهربائي وبتصطاد بتنويم مغناطيسي:
بعد ما أخذنا فكرة عن السمكة دي بقا هنتكلم دلوقتي عن المعلومة اللي أنت مستنيها وهى إنها بتصطاد بالتنويم المغناطيسي، مبدئياً كده السمكة دي بتتغذى على الرخويات والجمبري وسرطان البحر وأكثر حاجة بتحب تأكلها هى سرطان البحر، وكمان بتأكل الحبار اللي من نفس نوعها عادي.
لما السمكة دي بقا بتشوف فريسة، ساعتها السمكة بتتحرك ناحية الفريسة دي ببطء وثبات، و أثناء حركتها دي بتشغل على جسمها عرض ضوئي نابض ومزخرف، بيخطف نظر الفريسة لدرجة إنه بيخلي الفريسة تثبت في مكانها، أو تروحلها هى لحد عندها يعني حاجة كده شبه التنويم المغناطيسي، و أول ما الفريسة تقرب، بتسحبها السمكة على طول بالمجسات اللي اتكلمنا عنها وتبلعها.
![]() |
عرض ضوئي نابض ومزخرف |
القدرة الهايلة دي بقا مش بس بتساعد النوع ده من السمك إنه يصطاد بس، لا كمان الذكور بتستخدم القدرة دي في الصراع مع بقية الذكور الثانية والصراع ده مش بيكون عنيف، هو بيكون صراع رايق كده بيكون عبارة عن إنهم بيقفوا وكل واحد فيهم يشغل العرض الضوئي على جسمه، واللي العرض بتاعه يكون أحسن هو اللي بيكسب، أما لو الموضوع فيه إناث بقا فالصراع ده بيختلف وبيكون صراع بالجسم للحصول على الأنثى؛ لأن الإناث في النوع ده أقل من الذكور و التزاوج مش بيحصل غير مرة واحدة بس في عمرها القصير اللي هو سنتين فقط.
و عشان كده الصراع بيكون شديد بين الذكور و لما الذكر ربنا يكرمه بقا و يتزاوج مع الأنثى مش بيكون وراه أي حاجة ثانية غير إنه يحمي الأنثى لحد ماتضع البيض واللي بيكون مئات البيضات في المرة الواحدة و بتموت بعد ماتكون انتهت دورة حياتها.
اقرأ أيضا: حيوانات تقتل نفسها