![]() |
جزر مرعبة |
جزر مرعبة - أي حد فينا بيكون مهتم يعرف معلومات عن أي مكان جديد بيروحه، بس في أماكن لو عرفت تفاصيلها هتتجنبها و هتترعب من مجرد التفكير في زيارتها، أصل مش منطقي تروح تزور صاحبك في شقة عارف إنها مسكونة، وفي الموضوع ده من كوكب الإعلام هنتعرف على جزر مرعبة أوعي تزورها.
جزر مرعبة
الجزيرة الملعونة جزيرة جايولا:
بالرغم من إن الجزيرة دي جميلة نتيجة لقربها من خليج نابولي الإيطالي، إلا إن السكان اتعودوا يتجنبوها؛ و ده لأن بيتكتب على كل اللي بيسكن الجزيرة أو يشتريها، مصير محتوم سواء بسوء الحظ أو الموت، وتاريخ الجزيرة دي بيرجع لأوائل القرن الـ 19 لما كان عايش عليها ناسك منعزل اتعرف بإسم الساحر، واللي كان عايش عليها عن طريق الصدقة اللي يقدمها له الصيادون اللي كانوا متعودين يعدوا على الجزيرة دايما، وفجأة وبدون أي مقدمات اختفى الراجل بدون أي أثر من على الجزيرة والمنطقة كلها.
ومن علامات لعنة الجزيرة إن في عشرينيات القرن ال 20 كانت الجزيرة مملوكة من قبل السويسري هانز برون وعاش فيها هو وزوجته وفي يوم من الأيام، تم العثور على جثة هانز مقتول وملفوف في سجادة و محدش لقي دليل على القاتل أو حتي عرف سبب الجريمة، وبعدها بشوية لقوا زوجة هانز غرقانة في المياه بالقرب من الجزيرة، والمالك اللي اشترى الجزيرة بعدهم كان شخص ألماني أصيب بأزمة قلبية وتوفي
واللي بعده انتحر بعد ما اتجنن ودخل مستشفي الأمراض العقلية في سويسرا، وبعده كان راجل أعمال ألماني، يمتلك مصنع ضخم لصناعة الصلب لكن بعد ما اشتري الجزيرة بفترة أعلن إفلاسه وبعده امتلك الجزيرة الإيطالي الشهير جيانلي انيللي الرئيس السابق لنادي اليوفينتوس والمساهم في شركات فيات للسيارات اللي على الرغم من النجاح اللي حققه على المستوى المهني، إلا إنه واجه مصائب كتيرة على المستوي الشخصي بعد امتلاكه الجزيرة، واللي بعده كان الأمريكي الشهير جاي بول جيتي و اللي بعد ما امتلك الجزيرة توفي أصغر ابناؤه، وتم اختطاف حفيده وحاليًا الجزيرة جزء من محمية بحرية وتحت إدارة الحكومة.
جزيرة روانوك :
موجودة في غرب ساحل كالورينا الشمالية بالولايات المتحدة ، واللي بتعرف بإسم المستعمرة المفقودة، و دي واحدة من أغرب الألغاز وأكثرها رعبًا، الجزيرة كانت موقع لمستوطنة إنجليزية عام 1587 وكان عايش عليها 120 فرد و وقتها الجزيرة مكانتش مهجورة كان عايش عليها بعض السكان الأصليين الأمريكتين، والعلاقة بينهم وبين الإنجليز مكانتش في أحسن أحوالها، والموضوع ده خلى الحياة لأهل المستوطنة تكون صعبة وخصوصًا في ظل نقص الموارد باستمرار.
وفي نهاية 1587 قرر جون وايت -حاكم المستعمرة- أنه يسافر بريطانيا عشان يوفر الموارد اللازمة للسكان خصوصًا مع وجود أطفال بينهم لكن بسبب الحرب من الإسبان وايت معرفش يرجع للجزيرة غير بعد 3 سنين ولما رجع عام 1590 كانت المفاجأة مالقاش أي أثر، المستعمرة اختفت تمامًا بالسكان اللي عليها ومكانش فيه أي أثر للسكان ولا أحياء ولا أموات و لا حتى كان فيه أثر لمعركة أو دم أو أي حاجة توضح مصير أهلها كان إيه ولحد النهاردة وبعد 400 سنة عدت لسه مفيش أي تفسير للي حصل.
![]() |
جزيرة روانوك |
جزيرة نورفولك من الجزر المرعبة :
جزيرة استرالية صغيرة رغم إنها جميلة بس اتعرفت باسم جحيم المحيط الهادي، و الحقيقة إن اللي كان بيحصل على الجزيرة دي زمان يخليها تستحق إن يطلق عليها جحيم، و ده لأن في عشرينيات القرن 19 اختارت بريطانيا العظمي الجزيرة للمرة التانية؛ عشان يرجعوها مستعمرة عقابية لأسوأ المجرمين واللي كان بيتحكم عليه ويدخل الجزيرة دي، كان بيعرف إن الأمل في الخروج منها مستحيل، والمسئولون عن المستعمرة استغلوا المساجين في إنهم يجبروهم على الأشغال الشاقة في الجزيرة في الأعمال الزراعية وبناء الطرق وكل ده وهم متقيدين بسلاسل تقيلة جدا.
والعقاب اللي بيتعرض له المساجين بيتنوع بين حبس انفرادي وجلد وغيرها، و العذاب كان بيوصل المساجين إنهم يقتلوا بعضهم وده مش بدافع الكره أو الغضب، ولكن كانوا بيعملوا كده؛ عشان يتنفذ فيهم حكم الإعدام، فيرتاحوا من العذاب اللي بيشوفوه.
وانتشر عن الجزيرة إن أشباح المساجين اللي ماتوا على أرضها مازالت موجودة وبيحاولوا ينتقموا من اللي حصل فيهم، وانتشرت القصص عن حاجات مش طبيعية بتحصل في الجزيرة، زي سماع أصوات صراخ بالليل أو مشاهدة أشباح وغيرها، والغريب إن السكان المحليين استغلوا الجزيرة كمزار سياحي لجذب السياح وبيزورها كل سنة ما يقرب من 30 ألف سائح من اللي مهتمين بالإثارة وصيد الأشباح.
![]() |
جزيرة نورفولك من الجزر المرعبة |
جزيرة هارت من الجزر المرعبة :
في الحفر العميقة اللي موجودة في الجزيرة دي مات أكتر من مليون بني آدم، الجزيرة دي في الماضي كانت مركز إعادة تأهيل من المخدرات وسجن ومنطقة حجر صحي لمرضى الحمى الصفراء وعلى مدار السنين تم اكتشاف أكتر من 85 الف جثة مدفونة في مقابر جماعية على أرض الجزيرة والدخول للجزيرة محظور باستثناء الأشخاص اللي ليهم ناس ماتوا على أرضها، حتى دول كمان محتاجين تصريح؛ عشان يدخلوها وكتير من الأمريكان بيعتقدوا إنها مسكونة أشباح بسبب كمية الموتى اللي فيها.
![]() |
جزيرة هارت من الجزر المرعبة |
جزيرة بوفيليا :
جزيرة صغيرة موجودة على بعد أقل من كيلو متر من مدينة البندقية الإيطالية، الجزيرة دي كانت آخر ملجأ لمرضي الطاعون أثناء حكم الإمبراطورية الرومانية ومات على الجزيرة دي مئات الآلاف من المرضي، وفي القرن 18 تم استخدام الجزيرة مرة تانية كحجر صحي لمرضى الطاعون وغيره من الأمراض الخطيرة ومن كتر عدد الوفيات على الجزيرة كانت الجثث اللي مش بيتم حرقها بيتم دفنها في مقابر جماعية ويقال ان 50٪ من تربة الجزيرة تتكون من رماد الضحايا، وعام 1922 تم بناء مستشفى أمراض عقلية على الجزيرة، أشهر عن الجزيرة إن الأطباء هناك كانوا بيعملوا تجارب مخيفة على المرضى.
وبكده نكون خلصنا حكايات الجزر المرعبة في الموضوع ده من كوكب الإعلام.
-بس هل بعد كل اللي قولناه ده ممكن يجيلك فضول بردو تروح تشوف الجزر دي؟
- ما اعتقدش
جزيرة بوفيليا من الجزر المرعبة