![]() |
ورق الفقاعات الهوائية |
كتبت : إيمان توفيق
تخيل لو أنت نزلت الشارع و لقيت كل حاجة متغلفة بورق الفقاعات الهوائية هيكون إيه احساسك هل هتحس بالضيق ولا هتحس إنك مبسوط وعايز تجري علي الفقاعات دي تفرقعها كلها؟ في الغالب هتختار إنك تجري عليها تفرقعها، طب ياتري ليه بيجيلنا دايما الإحساس ده لما بنشوف ورق الفقاعات الهوائيه وهل ده له علاقة بتقليل التوتر؟ ده اللي هنعرفه في التقرير ده من كوكب الإعلام.
بداية وأصل ورق الفقاعات الهوائية :
سنة 1957 في حي في ولاية نيوجيرسي الامريكية داخل جراج صغير، اجتمع المهندس الكيميائي مارك شافان مع صاحبه المهندس الميكانيكي ألفريد فيلدنغ؛ عشان يعملوا تصميم لنوع جديد من ورق الحائط العازل ويصنعوه، و الفكرة اللي جت في بالهم وقتها، إنهم يعملوا ورق حائط يكون جواه فقاعات من الهواء وبالفعل قدر ألفريد إنه يصنع آله بتقدر تعمل معالجة حرارية لورق البلاستيك، وتعمل بداخله فراغات هوائيه و من خلالها وصلنا للشكل اللي بنستخدمه لحد النهارده، لكن مع الوقت اكتشفوا إن إستخدام ورق الفقاعات ده مش هينفع يتم إستخدامه كورق حائط ومش عملي .
عشان كده بدأوا يفكروا إزاي يستفيدوا من اختراعهم في حاجه تانيه، و في يوم من الأيام كان مارك مسافر بالطياره وشاف الغيوم وتأمل فيها و فكر إن الغيوم دي بتحاوط الطيارة وبتحميها من الرياح، طب ليه الورق اللي إحنا اخترعناه ده ما يعملش نفس الحاجة و وقتها فكر إن ممكن الورق ده يتم إستخدامه في تغليف الحاجات اللي ممكن تتكسر علشان يحافظوا عليها خلال نقلها وشحنها، و ساعتها مارك وألفريد عملوا براءة اختراع و أسسوا شركة اسمها sealed air ومعناها مؤسسة الهواء المعبأ و فعلا خرجت الشركة للنور وخرجت معاها صناعه جديده، و هي صناعه ورق التغليف المعبأ بالفقاعات و ساعتها واجهتهم مشكله، وهي إنهم إزاي هيقنعوا الشركات يشتروا الاختراع بتاعهم دي كانت مشكلة؛ لأن وقتها كان بيتم استخدام نشارة الخشب أو ورق الجرايد القديمة وغيرها من الحاجات الرخيصه دي كمادة عازله علشان يغلفوا بيها الحاجات اللي بتتكسر.
إقناع الشركات أن يقوموا بشراء ورق الفقاعات:
طب إزاي كان ألفريد ومارك هيقنعوا الشركات تسيب الحاجات اللي ببلاش دي ويلجأوا لحاجه بفلوس ! الموضوع فعلا إستغرق معاهم وقت كبير، لحد ما في سنه 1963 قرر فريدريك باورز مندوب مبيعات شركه seald air إنه يقنع شركه IBM اللي بتقوم بتصنيع وتطوير معدات الكمبيوتر والبرمجة إنها تستخدم المنتج بتاعهم اللي هو ورق الفقاعات في شحن ونقل الكمبيوترات الحساسه بشكل سليم وآمن، و استمرت الشركه مع الوقت في إنها تحسن منتجاتها وده خلاها تنتشر بشكل أوسع، و بقت الشركه رائده في صناعة الحاجة اللي اخترعوها ونالوا 2260 براءة اختراع من بداية تأسيس الشركه لحد سنه 2021م .
ليه بنحب نطرقع ورق الفقاعات الهوائية :
بعد ما عرفنا بقى قصه فقاعات الورق البلاستيكية جت منين ندخل بقى على السؤال اللي مستنين اجابته، إحنا ليه بنحب نفرقع الفقاعات البلاستيك دي وهل الموضوع ده فعلا بيقلل التوتر ولا لا؟ طيب أولا كده خلينا متفقين إن أي حركه صغيره بنكررها من غير ما نكون واعين بيها فهي بتقلل التوتر سواء كانت التكتكة بسن الألم، أو أكل الأظافر، أو هز الرجل بشكل سريع، أو طرقعه أصابع الأيد كل دي حاجات بتحصل لما الشخص بيمر بحاله بيطلق عليها اسم التململ وده بتتحكم فيه منطقة تحت المهاد في المخ جزئيًا والمنطقة دي هي المنطقة المسؤوله إنها تنظم نشاطات عفويه ولا واعية و عمليات جسدية كتيرة.
![]() |
ليه بنحب نطرقع ورق الفقاعات الهوائية |
سلوكيات يقوم بها الناس لتخفيف التوتر؟
في دراسه اتعملت في جامعة روهامبتون في لندن على مجموعه من الأشخاص، حطوهم تحت ضغوط علشان يكتشفوا إيه السلوكيات اللي ممكن تطلع منهم بدون وعي أثناء التوتر؛ علشان يقدروا يحددوا هل السلوكيات دي لها دور في تخفيف التوتر اللي بيتعرضوا له ولا لا.
وفي نهايه التجربه اكتشفوا إن الاشخاص اللي كان ليهم تصرفات عفويه زي هرش الجلد أو تمشيط الشعر باليد أو تحريكهم للخاتم اللي في ايديهم أو غيرها من السلوكيات اللاوعيه، كانت التجربه بالنسبه لهم أقل في معدلات التوتر بشكل عام، و ده معناه إن السلوكيات دي فعلا نجحت في تخفيف مستوي التوتر اللي كان عندهم، طيب دلوقتي عرفنا إن التصرفات العفويه اللي بنعملها بتقلل من التوتر هل بقى طرقعه الفقاعات البلاستيك هي كمان بتقلل التوتر ولا لا.؟
اقرأ أيضا: معاناة التفكير المفرط وأضراره وكيفية التغلب عليه
دراسات لفهم سلوك طرقعة الفقاعات الهوائية وهل لها دور في تخفيف التوتر:
الحقيقه فيه دراستين اتعملوا علي الموضوع ده، الدراسه الاولى اتنشرت سنه 1992 في جامعة "ويسترن نيو انجلاند" وفي التجربه دي جابوا 30 طالب اعمارهم ما بين 21 و 33 سنه و قسموهم على مجموعتين و الاتنين هيعدوا على نفس الخطوات بتاعة الاختبار بس بترتيب مختلف.
المجموعه الأولى أدولهم قايمة فيها 20 سؤال بيقيس أربع حاجات وهم " نسبه النشاط والتوتر والتعب والهدوء" اللي عندهم وبعدها قالولهم يستنوا على جنب خمس دقائق و يحلوا الأسئله مره ثانيه؛ علشان يتأكدوا إن كل حاجه مظبوطه وبعد كده إدولهم ورقتين من فقاعات البلاستيك يفرقعوها و يرجعوا يعيدوا حل الأسئله علشان يشوفوا هل طرقعه الفقاعات هتأثر في تقليل التوتر ولا لا.
أما بقى المجموعه التانيه فقالوا لهم طرقعوا فقاعات البلاستيك في الأول خالص قبل ما تحلوا أي سؤال، و بعدها حلوا الأسئله واستنوا خمس دقائق و عيدوا حل الأسئله مره تانيه و الغريب بقى إن الباحثين اكتشفوا إن الطلبه نشاطهم زاد بشكل ملحوظ وإحساسهم بالتعب قل و بقوا أهدأ بشكل أكبر وده معناه إن فرقعة فقاعات الهواء كان ليها تأثير ايجابي فعلا في تخفيف التوتر عندهم، و ده ساعدهم على الشعور بالاسترخاء بنسبه كبيرة ومن وقتها بقى ظهرت مجموعه مختلفه ومتنوعه من الألعاب الصغيره اللي بتكون في حجم الإيد واللي تم تصنيعها لنفس الغرض منها اللي بيلف، و منها اللي بيتمط، و منها اللي بيتطبق، المهم إنه يخلي الإيد مشغوله، و في حاجه مشتته الدماغ بعيد عن مصدر التوتر.
![]() |
دراسات لفهم سلوك طرقعة الفقاعات الهوائية وهل لها دور في تخفيف التوتر |
دراسة جامعة لوتون
فيه بقا دراسه تانيه في نفس المجله اتعملت في جامعه لوتون في 1994 يعني بعد سنتين بس من نشر الدراسه الأولى، وجابوا في الدراسة دي مجموعه من 18 طالب و 18 طالبه وقسموهم على مجموعتين بشكل عشوائي وطلبوا منهم يعدوا حلقه معدنيه عبر سلك معدني بحذر، و إلا هيطلع صوت صفاره ويخسروا و إدولهم مهله 30 ثانيه عشان يوصلوا لآخر السلك بنجاح.
يعني كانوا عاملين لهم كذا شرط يحسسهم بالضغط والتوتر وبعدها خلوا المجموعه الأولى تفرقع فقاعات البلاستيك لمده خمس دقائق و المجموعه الثانيه ما تفرقعش حاجه و على غير المتوقع بقى وعكس الدراسه الأولى، إن المجموعه اللي فرقعت الفقاعات البلاستيك كانوا متوترين أكتر من المجموعه اللي ما عملتش حاجه، و إن الفقاعات البلاستيك كان ليها تأثير عكسي عليهم، و استنتج الباحثين من التجربه دي إن زي ما فرقعة فقاعات البلاستيك ممكن تهدي بعض الناس فهي بردو ممكن توتر ناس تانية، و الموضوع بيختلف من شخص للتاني ومفيش قاعدة ثابتة فيه.
وبكده نكون اتكلمنا في التقرير ده من موقع كوكب الإعلام عن ورق الفقاعات البلاستيك اللي بتجنن ناس كتير و بتستفزهم يفرقعوها أول مايشوفوها.
اقرأ أيضا: اضطراب الشخصية النرجسية
الأسئلة
ماهي طرق تخفيف التوتر والضغط العصبي؟
يوجد طرق كثيرة لتخفيف التوتر و منها :
- إنك تنظم المهام اللي عايز تعملها؛ لأن التنظيم هيساعدك إن كل حاجة يكون ليها وقت مخصص، فهتقدر تعمل كل المهام بقدر أقل من التوتر عشان كده الروتين مهم، إعمل روتين يومي وحاول تمشي عليه .
- شتت عقلك، و أنت بتعمل المهمة افصل في النص 10 دقايق و إلعب لعبة بتحبها أو اتكلم مع حد بتحبه بس نصيحة ما تقلبش في السوشيال ميديا في الوقت ده؛ عشان مش هتبقي 10 دقايق هتبقي 10 سنين.
- أخرج لما الضغط يزيد عليك، إنزل إتمشي وإشتري حاجة بتحبها أو إتمشي و إرجع من غير ما تجيب حاجة مش عايزين فلوسنا تخلص بردو.
- مارس اليوجا عشان بتعتمد علي التنفس العميق وده بيساعد إن التوتر يقل ولو عايز طريقة أفضل من اليوجا، صلي بخشوع هتديلك نتيجة أحسن مليون مرة.
هل يوجد ألعاب لتخفيف التوتر؟
ايوة طبعا فيه زي :
- iss
- بوب يونيكورن
- مكعب إزالة التوتر
و كمان فيه ألعاب مجانية علي جوجل بلاي زي
- color puzzle
- antistress games
وفيه ألعاب كتير بتلهي العقل بردو موجودة مجانا علي فيس بوك زي:
- co caro
- carrom gold
- 4in a row online
- water color sort ودي زي color puzzle.