شقة العفاريت في بورسعيد |
لا تقترب من العمارة .. شقة العفاريت في بورسعيد
كتبت آية أبو النجا
شقة موجودة في بورسعيد تم إطلاق اسم شقة العفاريت عليها ؛ إيه اللي حصل وإيه حكاية الشقة دي ؟ ده اللي هيقدمه كوكب الإعلام.
بداية حكاية شقة العفاريت
البداية كانت من 20 سنة بمنطقة حي الزهور في عمارة رقم 11 لما حصل فيها انفجار قوي وقت آذان الفجر، والناس اتخضت من قوة الصوت وكله طلع يشوف في إيه ، ساعتها شافوا قدامهم منظر غريب للشقة اللي في العمارة وهو إن حيطانها متكسرة بطريقة غريبة والموضوع مكنش طبيعي.
والأغرب إن الحيطان كانت مخلوعة بدقة وشكلها متساوي كإن حد اللي عملها مش انفجار ، ده غير كمان إن مفيش أي أثر لنار انفجار أو حريق والغريب أكتر إن كل حاجة من جوا كانت سليمة وكأن لم يحدث شيء!؛ ده غير كمان عمود النور اللي كان تحت العمارة بالظبط اللمبة اللي فيها بدل ما كانت رأسها لتحت اتقلبت وبقت لفوق ..طب إزاي!، الناس شافت المنظر وكل ده وكانوا هيتجننوا ومحدش كان فاهم في إيه.
الفضول هيوديك في داهية!
اتقال إن اللي كان ساكن في الشقة دي دجال بس قال للناس إنه في حد أعطى له كتاب سحر أسود، وكان عنده فضول يقرأة وهو بيقرأ الكتاب حضر جن بالغلط والراجل معرفش يصرفه لأنه مكنش جن عادي فقام حبسه في الحمام، وقعد يكمل قراءة بره عشان ميتأذيش من الجن لحد ما جه وقت آذان الفجر وقام الجن محروق وحصل الانفجار في المنطقة.
ولما الشرطة وصلت قامت بإصلاح الشقة ورجعت زي الأول تانى بس الغريب إنها مقالتش عن السبب ورفضت الإعلان عن أي حاجة تخص الانفجار، وبعد عملية الإصلاح الشقة اتقفلت والأغرب إن قفل الشقة مكنش بالمفتاح وباب خشب أو حتى باب حديد ، لا ده باب من الطوب ..يعني إيه! يعني بقت حيطة عشان محدش يعرف يدخل الشقة ، والرعب كان مسيطر على كل اللي في منطقة حي الزهور.
تحول منطقة شقة العفاريت لمزار سياحي |
تحول منطقة شقة العفاريت لمزار سياحي
بسبب شهرة شقة العفاريت وانتشار الكلام عنها ده أدى إلى إن في ناس من محافظات مختلفة كانت بتسافر وتروح المنطقة مخصوص عشان تشوف الشقة، ومش بس كده لا ده كان في ناس موجودة هناك في المنطقة بتبيع "ترمس ولب وشيبسي" وكأن ده مزار مش مكان مرعب.
ومن وقتها لمدة 3 أسابيع فضلوا على الحال ده ، والشقة فضلت مقفولة لمده 20 سنة ومفيش أي حد راضي يسكن فيها لكن حاليًا اتقال إنها اتفتحت وفي ناس ساكنين فيها.
اقرأ أيضا: سراديب العظام البشرية