قصور رخيصة لكن لا يرغب أحد في شرائها .. ما السبب
كتبت : إيمان توفيق
أغلب الناس بتتمنى تعيش في قصر بشكله الفخم ومساحته الواسعة ورغم إن العيش في قصر ده حلم من الأحلام الصعبة إلا إنك لو بحثت شوية هتلاقي قصور بأسعار رخيصة، و أرخص كمان من بيوت بسيطة لكن لو قررت تعيش فيها ساعتها استحمل اللي هتشوفه؛ وهنتعرف من كوكب الإعلام علي حكاية القصور الرخيصة دي اللي محدش راضي يشتريها.
قصور رخيصة لا يرغب أحد في شرائها
قصر بيلارز ستيت :
في ولاية نيويورك بالولايات المتحدة، و تحديداً في القرن الـ 19 اتبنت قرية ألبيون بالقرب من بحيرة اونتاريو العزبة، وهي قرية صغيرة تبعد عن نيويورك بـ 570 كم يعني معزولة وبعيدة عن الونس، ووصل عدد سكان القرية دي في عام 2020 إلى 5637 شخص وبالرغم من عدد سكانها القليل، قرر الثري ويليام كار إنه يروح المكان ده ويبني فيه قصر بيلارز ستيت الفخم اللي مساحته بتوصل إلى 670 متر و ويليام بني القصر ده عشان يجتمع فيه هو وزوجته باتريشا و فيه أقاويل إن مراته ماتت في ظروف غامضة و إن محدش يعرف سبب وفاتها، و بدأت بعض الإدعاءات تقول إن القصر مسكون بالأشباح، وبعد الكلام ده القصر سوقه وقف وكل الناس خافت إنها تشتريه وفضل الوضع على ما هو عليه لسنين طويلة كانت بتنتقل ملكية القصر فيها من وريث للتاني وكلهم كانوا بيحاولوا يخفضوا سعر القصر على قد مايقدروا عشان يعرفوا يبيعوه.
![]() |
قصور رخيصة لا يرغب أحد في شرائها |
![]() |
قصر بيلارز ستيت |
البلد المتحضرة بتؤمن بالأشباح
ولو مستغرب إن رغم وجود قصر بيلارز في بلد متحضرة لكن محدش راضي يشتريه عشان الأشباح فده لأن 57 ٪ من الأمريكيين مؤمنين عادي بالأشباح و الأرواح و قرر واحد من الـ 43٪ الباقيين اللي مش بيؤمنوا أوي بالكلام ده إنه يستفيد من القصر ده اللي قيمته ملايين الدولارات، و بالفعل اشتراه من الورثة بسعر زهيد جداً 52 ألف دولار بس بعد ما كان بيقدر بملايين، وفي عام 2006 اشترى رجل الأعمال توني ماكنورتري القصر؛ عشان يستثمر فيه وكانت الخطة بتاعته إنه يجدد القصر وبعدين يحاول يبيعه مرة ثانية.
لكن عشان يحقق ده كان لازم يقعد هو ومراته فترة في القصر عشان يثبتوا للناس إن القصر مش مسكون ولا حاجة، فيحسن صورة القصر و يكذب الإشاعات ، لكن الغريب إن بعد ماقعدوا فترة في القصر ابتدوا يقتنعوا بكلام الناس بدل ما هم اللي يقنعوهم؛ لأن الزوجين قالوا إنهم كانوا بيشوفوا البيانو بيعزف لوحده وكانوا بيسمعوا أصوات بتنادي عليهم بالإضافة لوشوش كانت بتظهر لهم في المرايا وغيرها من الأحداث الغريبة، و الاعترافات دي طبعاً اتقالت بعد فترة كبيرة من التكتم؛ عشان يحاولوا يبيعوا القصر بأي ثمن لدرجة إن آخر عرض لبيع القصر كان 500 ألف دولار وده سعر أقل بكثير من قيمة القصر الحقيقية، و رغم كده فالقصر لسه موجود بعد عرضه من 2017 لحد الآن محدش عايز يشتريه.
برج هادلو :
قصر مبتكر علي هيئة برج موجود في لندن و بيرجع تاريخ بنائه لعام 1879 وخلال الفترة دي انتقلت ملكية القصر لعدد كبير من الملاك، ومكانش الملاك بيتمسكوا بالقصر لفترة طويلة و ده بسبب تصميم القصر المرهق؛ لأنه عبارة عن برج طويل وضيق وبيعتمد في توزيع حجراته على التوسع الرأسي مش الأفقي وطول البرج ده 53 متر، وده بيعادل ارتفاع مبنى مكون من 17 دور وعشان كده التنقل داخل القصر ده صعب بالإضافة إلى إن تصميمه معتمد على السلالم مش الأسانسير.
وأفضل المحاولات اللي اتعملت مع برج هادلو كانت محاولة المؤسسة الخيرية viva trust في 2010 عن طريق وضع أسانسير بيوصل للدور الرابع والصعوبات اللي بتقابل المشروع هو إن البرج قايم على الخراسانات غير المسلحة، فأي تعديل في المبنى ممكن يأثر على الأساسات بشكل كبير وعشان كده البرج محتاج إن حد يشتريه على وضعه كده ومن 2018 القصر محطوط للبيع بسعر مفتوح قابل لأي تفاوض ومستني اللي يجرب حظه في التعامل معاه ويشتريه.
![]() |
برج هادلو |
قصر جرانوت لوما من القصور الرخيصة :
قصر ضخم موجود على ساحل بحيرة سوبيريور في ولاية ميتشيغان الامريكية، اتبنى عام 1919 اتبنى بناءاً على طلب من أحد المليونيرات، وفضل عشرات السنين ملك له لحد ما مات عام 1942 وبيقال إن القصر اتعرض لمشاكل بين الورثة وسلطة الولاية و اللي فضلت موقفة حاله وبتقلل في سعره 45 سنه كاملين لحد ما في النهاية تم بيعه عام 1987 للمستثمر توم بالدوين، و اللي قدر يخلص سعر القصر بعُشر قيمته الحقيقية.
وبكده قصر جرانوت اللي تم تقدير ثمنه الحقيقي بـ 40 مليون دولار أخذه بالدوين ب 4.2 مليون دولار وعمل فيه بعض الإصلاحات وجدد بعض الديكورات، وعرضه مرة ثانية للبيع بسعره الحقيقي 40 مليون دولار لكن نتيجة لبعض المشاكل في الأوراق واللي كان تغاضى عنها بالدوين لما اشتراه، ما حدش وافق يشتري القصر، و على مدار 4 سنين من محاولات بيع القصر بالدوين نزل أكثر من نص ثمن سعر القصر، لكن بردو محدش راضي يشتريه وكان الحل الأخير لبالدوين إنه يعرض القصر للبيع بأي سعر تفاوضي يمكن الاتفاق عليه، والنهاردة و بعد 35 سنة من محاولات بيع القصر لسه محدش راضي يشتريه.
![]() |
قصر جرانوت لوما من القصور الرخيصة |
![]() |
قصر جرانوت لوما |
قلعة إلدا :
مبنى فني جميل مصنوع من الحجر والجرانيت، صممه المهندس المعماري ديفيد ابيركرومبي، وكلمة إلدا ترمز للحروف الأولى من أسماء أبنائه وهم " ايبوت - لوسي - ديفيد - اليزابيث" و القلعة دي موجودة في قرية اوسينينج بولاية نيويورك الأمريكية و اتبنت القلعة عام 1927 و اكتملت خلال سنتين وعاشت فيها الأسرة المكونة من ست أفراد، و بمرور الزمن و حلول عام 1964 كان كل اللي اتبقى من الأسرة هم أبوت ولوسي و مع انشغال كل واحد بحياته الشخصية، بدأ الإهمال يدب في القلعة خصوصاً مع سوء استخدام المستأجرين، ورغم كل المحاولات اللي اتعملت لترميم القلعة والمحاولة إنها ترجع لعهدها القديم إلا إن كم المحاولات دي فشلت، وأصبح مجرد الاقتراب من القلعة خطر لاحتمال سقوط أحجار منها أو سقوط القلعة كلها وتم عرضها للبيع من فترة تزيد عن 30 سنة على أمل إن حد يشتريها ويعملها الصيانة المطلوبة.
![]() |
قلعة إلدا |
اقرأ أيضا: السفر عبر الزمن