مثلث برمودا .. مثلث الرعب أو "مثلث الشيطان"
كتبت : إيمان توفيق
منطقة مرعبة بتدور حولها الأساطير على مدار السنين و بتشكل لغز كبير لكل اللي بيسمعوا عنها؛ و ده بسبب اختفاء السفن و الطائرات اللي بتعدي من عندها، و في الموضوع ده من موقع كوكب الإعلام هنتعرف أكثر عن تفاصيل منطقة مثلث برمودا، و نتكلم عن نظريات اتطرحت لحل اللغز الغامض للمنطقة المرعبة دي.
مثلث برمودا أو مثلث الشيطان:
منطقة موجودة في الجزء الغربي من شمال المحيط الأطلسي، تقع بين ساحل فلوريدا و بورتريكو و جزيرة برمودا؛ وعشان كده أطلق عليها اسم مثلث ، وأغلب الناس عارفين المنطقة دي سواء سمعوا عن اسمها بس أو عرفوا تفاصيل عنها وفيه منهم اللي كان له ناس يعرفها واختفوا هناك، منطقة مثلث برمودا عليها إجماع إنها منطقة مرعبة؛ و ده بسبب اختفاء الطائرات والسفن اللي بتعدي عليها من غير ماتسيب أي أثر أو بقايا حطام و كأنها اتبخرت باللي عليها.
و طريق مثلث برمودا بيُستخدَم كثير من قبل السفن السياحية والقوارب اللي بتسافر بين ساحل فلوريدا و الجزر اللي حواليه والولايات المتحدة وبريطانيا أو الطائرات اللي بتتجه لجزر الكاريبي أو أمريكا الجنوبية، كل دول بيعدوا على مثلث برمودا ورغم إن مش كل الرحلات اللي بتعدي من هناك بتواجه نفس المصير وتختفي، إلا إن كثير من الرحلات دي مش بتوصل وبيتبخر أثرها تماماً.
مثلث برمودا |
حادثة حصلت في منطقة مثلث برمودا :
من إحدى الحوادث اللي حصلت في المنطقة دي كانت في يوم ٥ ديسمبر عام ١٩٤٥ لما خرجت ٥ طيارات قاذفة للقنابل والتابعة للبحرية الأمريكية من القاعدة بتاعتها في فلوريدا؛ عشان يعملوا طيران تدريبي فوق المحيط الأطلسي وبعدين يرجعوا، والرحلة دي كان اسمها الرحلة ١٩ وكانت الطيارات دي بتحمل ٥ طيارين و ٩ مساعدين و بيرأسهم قائد السرب، الملازم شارل ستيلور.
والطيارات دي بعد ما طلعت ما رجعتش تاني للقاعدة و اختفت من غير ما تسيب أي أثر ليها و آخر رسالة وصلت للقاعدة من قائد السرب كان بيستغيث فيها وبيقول إن حصل تشوش في أجهزة الطيارة، و إنه مابقاش قادر يحدد موقعه و إن كل حاجة حواليه شكلها مختلف وبعدها اتقطع الاتصال تماماً و اتحركت طيارتان من القاعدة مع طقم مكون من ١٣ فرد على كل طيارة؛ وراحوا للمكان اللي كانت الطيارات رايحة له عشان يدوروا عليها، لكن للأسف بدون فائدة ، مكانش فيه أثر أو بقايا حطام لأي طيارة من ال ٥ طيارات اللي طلعت و أثناء عودة الطيارات اللي راحت تدور عليهم، اختفت منهم واحدة بردو بدون أي أثر و وقتها وصل عدد المفقودين لـ ٢٧ شخص و ٦ طيارات .
و دي كانت حادثة من ضمن الحوادث الكثيرة اللي حصلت في منطقة مثلث برمودا، و اللي أثارت الفضول والتساؤلات عند الناس عن مكان الطيارات وإزاي اختفت؟ وإيه أصلاً السبب في اختفائها؟ و هنتكلم دلوقتي عن عدة نظريات أطلقها العلماء عن المنطقة دي، بعضها نظريات علمية و بعضها الآخر عبارة عن اجتهادات شخصية مالهاش أي أساس علمي واضح.
اقرأ أيضا: طيار نجى من مثلث برمودا يروي ما رآه
النظرية الأولى أطلنطس المفقودة :
ودي واحدة من النظريات اللي بتفسر سبب اختفاء الطائرات والسفن اللي بتعدي من منطقة مثلث برمودا، وبتقول إن المنطقة دي هي نفس المنطقة اللي غرقت فيها مدينة أطلنطس المفقودة و الباحث إدغار كيس تنبأ إن علماء الآثار هيلاقوا مدخل مدينة أطلنطس سنة ١٩٦٨ ووقتها لقى العلماء آثار تكوينات حجرية غريبة، و إن ممكن تكون الدليل على وجود أطلنطس، والأسطورة بتقول إن الأطلنطيين كانوا بيستخدموا كريستالات طاقة في التكنولوجيا بتاعتهم، و إنها بتطلع موجات طاقة من أعماق المحيط بتخلي السفن والطيارات تفقد كل اتجاهاتها ونظامها يختل فبتحصل الحوادث.
النظرية الأولى أطلنطس المفقودة |
مدينة أطلنطس المفقودة |
تشوه في الزمكان :
النظرية دي بتقول إن فيه بوابات في منطقة المثلث والبوابات دي بتسافر عبر الزمن أو بتنقلنا لبعد تاني لكن ده مالوش أي أدلة علمية، و بعض التقارير بتقول إن في ال ٥٠٠ سنة الأخيرة مات بسبب مثلث برمودا أكثر من ١٠٠٠ إنسان، و إن في القرن الأخير غرق فيها أكثر من ٥ سفن و ٢٠ طيارة.
تشوه في الزمكان |
تيار الخليج :
ده نهر عملاق ماشي تحت سطح البحر طوله بيمتد من خليج المكسيك وبيمشي في مضيق فلوريدا لحد شمال المحيط الأطلسي، وعرض تيار الخليج من ٦٥ إلى ٨٠ كم وبيقدر ينقل حطام أي حاجة بسرعة توصل إلى ٩ كم /الساعة أو أكثر، وسهل جداً إنه ينقل حطام أي سفينة أو طيارة لمكان بعيد جداً عن المسار بتاعها، وغير كده منطقة المثلث فيها خنادق عميقة جدا، منهم بيوصل عمقه إلى ٨٥٠٠ متر و ده معناه إن حطام الطيارات والسفن لو عدت من التيار بسلام، فهي مش هتعدي من الخنادق وهتختفي في أعماق المحيط.
تيار الخليج |
الأمواج العملاقة في منطقة مثلث برمودا:
العواصف اللي بتحصل في " المحيط الاطلسي" بتعمل تغيير في الجو بشكل مفاجئ ومش متوقع، خاصة في منطقة المثلث وده بيخلي مجموعة كبيرة من العلماء يقولوا إن الأمواج العملاقة دي هي السبب في حوادث الاختفاء اللي بتحصل، و ده بعد ما تم اكتشاف الأمواج دي في أوائل التسعينات وطبقاً لأقوال الباحث نورمان هوك، فالحوادث دي كلها مرتبطة بالعوامل الجوية و إن كمية الأعاصير والأمواج دي كلها هي السبب في غرق السفن، وحديثاً أثبتت الدراسات بواسطة القمر الصناعي إن فيه موجة طولها وصل ل ٢٥ متر أو أكثر وده زي ارتفاع مبنى مكون من ٩ أدوار.
الأمواج العملاقة في منطقة مثلث برمودا |
الضباب الإلكتروني :
النظرية دي كانت النظرية الوحيدة اللي شافها بني آدم وقدر يحكي عنها بعد نجاته من مثلث برمودا، و اللي طرح النظرية دي طيار اسمه "بروس جيرنون" بعد ما قام برحلة فوق مثلث برمودا عام ١٩٧٠ والطيار بيقول إنه الطيارة دخلت بيه في دوامة كبيرة من الضباب اختلت بعدها كل أنظمة الملاحة بتاعة الطيارة و جعلته يتجه ناحية ميامي، رغم إنه في الأصل كانت وجهته بيميني، و من هنا جاءت نظرية إن ممكن المثلث يكون في حاجات بترتبط بالسفر بالزمن.
الضباب الإلكتروني |
هيدرات الميثان :
بتقول النظرية دي إن فيه حقل عملاق من غاز الميثان موجود تحت المحيط الأطلسي و متركز في منطقة مثلث برمودا ولما بتحصل أي زلازل أو انزلاقات أرضية في قاع المحيط ساعتها بيخرج جزء من غاز الميثان ده، و التجارب أثبتت إن الفقاعات اللي بتخرج من الغاز بتقدر إنها تغرق سفينة بسهولة؛ لأن الغاز بيقلل كثافة المياه فمش بتكون قادرة تشيل السفينة، ده غير إن الميثان غاز قابل للاشتعال جداً فلما بيقرب من موتور طيارة أو سفينة ممكن يخليها تنفجر بسهولة جداً.
هيدرات الميثان |
وبكده في الموضوع ده من كوكب الإعلام نكون خلصنا و لخصنا تعريف النظريات اللي بتحاول تحل لغز المثلث المرعب ده وما زالت النظريات دي مجرد تفسيرات و اجتهادات ومفيش لسه حاجة أكيدة لحل لغز المنطقة دي.
اقرأ أيضا: مثلث برمودا النسخة المصرية
الأسئلة
هل في يوم من الأيام هنقدر نوصل للحل الأكيد للغز مثلث برمودا؟
محدش يقدر يعرف.