كتبت أية أبو النجا
أبو النحاس مقبرة سفن البحر الأحمر ، دايمًا حوادث اختفاء السفن بتكون هي الأكثر إثارة ، واختلفت الأسباب وراء ذلك...هل ده كان نتيجة الأمواج والرياح.؟ ، أو الدوامات المائية هي السبب … ولا زي ما قالت الأساطير وجود جن بيقوم بسحب السفن للأسفل.؟
طبعًا كلنا سمعنا عن مثلث برمودا والقصص اللي حكت عن اختفاء سفن ومراكب في ظروف غامضة ، ولكن البعض مايعرفش إن مصر فيها موقع مهم جدًا للغطس يسمى " أبو النحاس " .. وبيقع على بعد 35 كيلو من غرب جزيرة شدوان التي أمام مدينة الغردقة ، ويعتبر المنافس لمثلث برمودا الغامض.
ورغم من وجود أكتر من عشرين موقع للسفن الغارقة ، لكن أبو النحاس يعتبر المنطقة الوحيدة اللي موجود فيها حطام أكبر 5 سفن عملاقة ، وتمتلكها هيئة الموانئ ، ووزارة البيئة بتسعى دايمًا إنها تحافظ على حطام السفن عشان وجودها في القاع بيقلل من خطر الشعاب المرجانية على الملاحة.
وتعددت الأساطير حول تسمية المكان بأبو النحاس ؛ البعض قال تسميته بترجع لكونه مكان منحوس وشئوم على السفن ، وده بسبب إن كل ما سفينة تعدي من المكان تغرق .. والبعض التاني قال بسبب غرق إحدى السفن المحملة بالنحاس في المنطقة.
وقاع أبو النحاس مليء بالسفن الغارقة اللي مقدرش الباحثون إحصائها لحد الآن ، ولكل سفينة منهم حكاية مختلفة عن التانية ، ومفيش بينهم أي حاجه مشتركة غير سبب نهايتهم وهو الغرق.
وأشهر السفن الغارقة في مثلث برمودا مصر:
سفينة تدعى إس إس كارناتيك " SS.carnatic "
وكانت متجهة في طريقها إلى الهند عام 1869 ، وكانت محملة ببضائع من الذهب بقيمة 40 ألف جنيهًا إسترليني ، والنحاس والقطن والخمور ؛ ولما بدأت السفينة تغرق عاند القبطان ورفض نزول الركاب على جزيرة شدوان.
بس بعد ما وصلت المياه لغليات السفينة اضطر القبطان يسيب الركاب إنهم ينزلوا على الجزيرة ، بس ده كان بعد فوات الأوان ومات 31 راكبًا ، منهم 26 شخصًا من طاقم السفينة.
وحطام السفينة هو أقدم وأشهر حطام موجود في قاع مثلث أبو النحاس ؛ وفي كلام بيتقال إن كنز الذهب لسه موجود في قاع البحر لحد دلوقتي.
بس زي ما إحنا عارفين إن الإشاعات عندنا مفيش أكتر منها ، فأحب أقولك إن دي إشاعة لأن مفيش سبيكة ذهب واحدة فضلت ، لأنهم بعتوا غواصين علي أعلى مستوى من الخبرة والكفاءة عشان يطلعوا الذهب …وفعلاً بعد أسبوعين من غرق السفينة قدروا الغواصين إنهم يطلعوا كل الذهب اللي غرق.
سفينة كريسولاك اليونانية "Chrisoulc "
كانت محملة بالبلاط والأحجار ومتجهة إلى السعودية وده كان في عام 1978 ، ومن سوء الحظ مرت على مثلث أبو النحاس ، وغرقت بعد يومين من بداية رحلتها … وما زالت حتى الآن صناديق البضائع موجودة في قاع المثلث.
وفي نفس السنة اصطدمت سفينة كيمون إم اليونانية "Kimon M" ودي بقا أحلى وأجمل السفن اللي غرقت ، تقدر تقول كدة ملكة جمال السفن.
سفينة إس إس زيستل جورم البريطانية " SS.ThistIegrom"
ودي كانت متجهة ناحية شمال إفريقيا محملة بالسلاح والمعدات الحربية ، وده لأنها سفينة اعداد عسكرية مشاركة بالحرب العالمية الثانية سنة 1941 ، ولحد دلوقتي ما زالت موجودة بقاع مثلث أبو النحاس بكل اللي كان عليها من سلاح وموتسكلات وعربيات حربية.
وفي عام 1983 سفينة شحن يابانية تدعى غيانيس دي "Giannic D " متجهة من كرواتيا للسعودية ، وكانت محمله بشحنة من الخشب.
و في طريقها كانت بتمر بممر شحن ضيق وبمجرد ما خرجت للمياه المفتوحة القبطان ساب السفينة لأحد الظباط وراح يرتاح وهو فعلاً ارتاح الراحة الأبدية ، ودة لأن الظابط ماقدرش أنه يتحكم في السفينة اللي خرجت عن مسارها وذهبت لمصيرها بالغرق في مثلث أبو النحاس.
أما أخر السفن فهي سفينة أولدن "Olden" الألمانية اللي غرقت عام 1987 بنفس المكان ونفس الطريقة.
وبسبب الغموض وراء الكتير من القصص وغرق السفن ، وبعض الغواصين والصيادين فتم إطلاق (مثلث برمودا مصر) على مثلث أبو النحاس.
ده غير كمان السبب التانى وهو إن المنطقة مثلثة الشكل زي مثلث برمودا بالظبط " فولة وإتقسمت نصين " ؛ بس الغريب إن مثلث أبو النحاس منطقه مافيهاش أي دوامات مائية على عكس المعروف عن مثلث برمودا.
وعشان إن الموجه هاديه خالص والجو هوس هوس ، ومفيش أي سبب لغرق السفن فالناس بدأت في تأليف قصص بإن المكان مسكون بالجن والعفاريت.