![]() |
مدينة شفشاون - المدينة الزرقاء في المغرب |
كتبت : إيمان توفيق
المدينة الزرقاء شفشاون في المغرب - المدينة الزرقاء في المغرب مدينة شفشاون، اتلونت باللون الأزرق لأنه لون بيدي إحساس بالطمأنينة والسلام، واللي لونوها باللون ده مكانش عندهم فكرة إنها هتبقى جميلة لدرجة إن هيطلق عليها لقب "الجوهرة الزرقاء" وإنها هتكون مدينة سياحية بتجذب السياح من جميع أنحاء العالم، وإنها كمان هتبقى من أهم المدن السياحية في القرن الـ ٢١ وفي التقرير ده المقدم من كوكب الإعلام هنعرف إيه قصة مدينة شفشاون، و مين اللي لونها باللون الأزرق الجميل ده.تأسيس مدينة شفشاون
بعدما سقطت دولة الأندلس اللي أعلنت سقوط المملكة الإسلامية في أسبانيا، كان فيه مجموعة كبيرة من المسلمين لسه تحت الحكم الجديد اللي جه لأسبانيا، و الحكام الجدد خيروا المسلمين الموجودين بين إنهم يعتنقوا الديانة المسيحية، أو يسيبوا البلاد و يعيشوا في بلد تانية خارج اسبانيا ومابين عامي ١٦٠٩ و ١٦١٤ الحكومة الإسبانية أجبرت المسلمين اللي مازالوا موجودين في أسبانيا أنهم يغادروا البلاد و يلجأوا لشمال أفريقيا، و المجموعة اللي اتنقلت هناك دي أطلق عليهم اسم المورسكيين و المجموعة دي تم تهجيرها لشمال أفريقيا وتركيا و الشام وكتير منهم نزلوا في الجزائر وتونس و المغرب وليبيا، والمجموعة اللي سكنت في المغرب سكنت بالتحديد في مدينة شفشاون، و دي مدينة مغربية موجودة في شمال المغرب.
![]() |
شفشاون - المدينة الزرقاء في المغرب |
مؤسس المدينة الزرقاء
تأسست المدينة أول مرة في عام ١٤٧١ م على يد الأمير القائد الحسن علي بن راشد، و اللي اشتهر بعد كده بمولاي علي ابن راشد، و بناها الأمير عشان تكون خط دفاع ضد هجمات البرتغاليين اللي سقطت في أيديهم مدينة طنجا كغيرها من المدن الساحلية هناك وقتها؛ وعشان كده فكر الأمير في بناء المدينة دي لمنع توسعات البرتغاليين و اتبنت المدينة في سفوح قمم جبال الريف الموجودة في أقصى شمال المغرب.
و بكده تبقى مصد للاحتلال خصوصاً إنها بتتميز بتضاريسها الحادة اللي فيها انحدارات مفاجئة وتعرجات وانكسارات و أودية منخفضة، و ده أدى إلى اطلاق اسم شفشاون على المدينة؛ لأن شيفشاون بتنقسم لمقطعين المقطع الأول "شيف" الأمازيغي واللي معناه انظر و المقطع الثاني "شاون" واللي معناها القرون وعلى بعضها معناها "انظر القرون" وده لأن المدينة بتحيط بيها القمم الجبلية من كل الجهات بشكلها اللي بيشبه القرون.
![]() |
شفشاون - المدينة الزرقاء في المغرب |
جمال شفشاون لا يقتصر على اللون فقط :
أول ما تنزل تتمشى في المدينة، هتحس إن أنت ماشي في السماء أو تحت البحر؛ لأن اللون الأزرق منتشر في كل مكان و موجود بكثرة على جدران البيوت والمباني والشوارع و أعمدة الإنارة ومزهريات الورد اللي بتزين كل مبنى و شارع، و على الرغم من جمال المدينة إلا إن جمالها يكمن كمان في هدوئها و بساطة شعبها في اللبس و المعاملة وأسلوب الحياة.
![]() |
اللون الأزرق منتشر في كل مكان في مدينة شفشاون |
![]() |
بساطة شعب شفشاون في اللبس - المدينة الزرقاء في المغرب |
![]() |
المدينة الزرقاء في المغرب |
بالإضافة لأن شعب شفشاون متعاون جداً مع بعضه غير إنه مش بيغير حاجة في تقاليده وعاداته، على الرغم من اختلاطه بثقافات كتيرة نتيجة لأن بيجيلهم سياح من كل مكان في العالم ولو ربنا كرمك وسافرت هناك هتلاقي إن التعامل معاهم مريح في كل حاجة حتى في البيع والشراء لو حبيت تشتري حاجة من بضائعهم المحلية، ومش هتحس وسطهم بالغربة و لا بالخوف لأنهم هيتعاملوا معاك بلطف و بساطة و طيبة.
ولو كنت من محبي القطط، فالمدينة دي هتكون المفضلة ليك لأنك هتلاقي قطط في كل مكان وده لأن أهل المدينة بيهتموا بتربية القطط والعناية بيها وهم في الشارع من غير مايحبسوهم في البيوت، وبالتالي هتلاقي القطط هناك ودودة ونضيفة وهتقابلهم حواليك في كل مكان.
![]() |
صور قطط |
![]() |
قطط مدينة شفشاون - المدينة الزرقاء في المغرب |
![]() |
صور قطط |
سبب اللون الأزرق لمدينة شفشاون
سكان المدينة من المسلمين المورسكيين اللي اضطروا يسيبوا بيوتهم و أراضيهم بعدما تم إجبارهم من قبل الحكم الجديد على اعتناق الدين المسيحي و اتعرضوا لاضطهاد ديني كبير بعدما سقطت الأندلس، لونوا المدينة اللي عايشين فيها كلها اللي هي شفشاون باللون الأزرق بالإضافة إلى بعض اللون الأبيض.
و لونوها باللون ده كرمز للسلام والطمأنينة والتسامح مع شعب المغرب وغيره من الأعراق التانية ومن هنا تم إطلاق اسم "الجوهرة الزرقاء" على المدينة، و تحولت من مجرد مدينة عادية زي أي مدينة إلى مدينة خلابة ومزار سياحي بيجيله الناس من كل مكان وأصبحت من أجمل المدن في العالم.
![]() |
سبب اللون الأزرق لمدينة شفشاون - المدينة الزرقاء في المغرب |
اقرأ أيضا: بومبي (قرية الفاحشة)…التي جعلها الله آية