بوابة الجحيم فوهة مشتعلة بالنيران طوال الوقت |
كتبت : إيمان توفيق
"بوابة الجحيم" فوهة مشتعلة بالنيران طوال الوقت - فوهة دارفازا أو بوابة الجحيم، هي حفرة في وسط صحراء كاراكوم بدولة تركمانستان و دي دولة موجودة في آسيا الوسطى
فوهة دارفازا أو بوابة الجحيم تعتبر سبب رئيسي في جذب السياح من جميع أنحاء العالم وهى السبب في إن دولة تركمانستان أشتهرت.
كيف تكونت بوابة الجحيم
فوهة دارفازا أو بوابة الجحيم مش ظاهرة طبيعية هي تكونت بفعل الإنسان
عام 1971 م لما كانت دولة تركمانستان خاضعة للإتحاد السوفيتي قام مجموعة من الجيولوجيين ومهندسي البترول السوفييت باكتشاف صحراء كراكوم، للبحث عن حقول البترول ولكنهم وجدوا إن الغاز الطبيعي موجود بكمية كبيرة هناك و تحمسوا لكمية الغاز دي و توقعوا إنه موجود في موقع معين وسط الصحراء وراحوا للموقع ده وبدأوا يحفروا وفجأة أنهارت الأرض من تحتهم و ابتلعت المعدات اللي كانت بتحفر و تكونت حفرة عمقها 20 متر يعني كأنك بتبص على الشارع من الدور السابع.
ولأن الغاز الطبيعي بيتكون من غاز الميثان ومع إنه غاز غير سام إلا إنه بيسبب اختناق وممكن يؤدي لانفجارات حتى لو تركيزه في الهواء كان بسيط، فالجيولوجيون كانوا قدام حل من اتنين
أول حل : إنهم يكملوا حفر و يستخرجوا أكبر كمية من الغاز و يسيبوا الباقي يطير في الهواء بس ده كان هيسبب كارثة كبيرة ليهم و للناس اللي عايشين في الدولة؛ لأن الغاز اللي هينتشر هيسبب آلاف القتلي.
والحل التاني: إنهم يولعوا نار في الحفرة دي عشان الغاز اللي فيها يتحرق و النار تنطفي لوحدها بعد أسابيع قليلة.
واختاروا الحل التاني وولعوا نار في الحفرة بس طبعاً اعتقادهم في إن النار اللي في الحفرة هتنطفي بعد أسابيع كان غلط لأن الحفرة فضلت والعة لمدة 50 سنة وهتفضل مشتعلة لحد ما رواسب الغاز الطبيعي اللي فيها تخلص
بس بدل ما الفوهة دي كانت هتشكل خطر على الجيولوجيين والناس، بقت مزار سياحي وسبب أساسي بيدخل فلوس للدولة.
لكن ماينفعش الناس يقربوا من الفوهة أوي لأن لهيب النيران اللي فيها بتطلع حرارة عالية ده غير إن ريحتها نفاذة وتشبه رائحة البيض المتعفن اللي مصدره كبريتيد الهيدروجين.
وبالرغم من صعوبة القرب من الفوهة ففي عام 2013 م كان المغامر الكندي جورج كورونيس أول إنسان ينزل في قلب بوابة الجحيم،
ووصفها إنها مدرج من النيران، و إن صوت احتراق الغاز في الحفرة مرعب بيشبه صوت محرك نفاث و الاحتراق جواها مش بيسبب دخان فده مش بيسبب صعوبة في الرؤية جواها.
اقرأ أيضا : طيار نجى من مثلث برمودا يروي ما رآه
اقرأ أيضا :" أنت على قائمة الانتظار "