كتبت: إيمان توفيق
إحنا مخلوقين لسبب رئيسي، وهو إننا نعبد ربنا و نعمر الأرض، و أثناء ما بنعمل ده بنقابل تحديات كتيرة زي نفسنا الأمارة بالسوء اللي دايما عايزانا نكسل و ما نجتهدش إننا نكون بني آدمين أحسن، بترجعنا عن أي حاجة صح ممكن نعملها،و بتزوقنا ناحية أي حاجة غلط؛ علشان كده هي عدونا اللي عايش جوانا للأبد، ربنا أمرنا نجاهد العدو ده ونقوله لا، ونعمل عكس كل اللي بيقولنا عليه، وكمان فيه الشيطان اللي بيوسوسلنا؛ عشان نعمل كل حاجة غلط.
والفرق بين النفس والشيطان، إن الشيطان لو أمرك تعصي ربنا في حاجة وأنت تمسكت بمبادئك ومعملتش الحاجة دي فهو مش هيفضل يزن عليك فيها، هيجيلك من سكة تانية لمعصية تانية، أما النفس الأمارة بالسوء فهي العكس، هي بتزن عليك تفضل تعمل حاجة بعينها وبتكون دي الحاجة اللي بترضيها، وكل ما بيبقى فيه ناس في حياتك مؤذية أو بتضغط عليك كل ما الجيش اللي بتحاربه في المعركة دي بيزيد طب هل من العدل إنك تكون في المعركة دي كلها لوحدك؟ لا طبعا و عشان كده إحنا بناخد القوة كلها من ربنا على أي حاجة و والقوة دي موجوده في الصلاة.
الصلاة هي الرباط اللي بيننا وبين ربنا، هي اللي بتغيرنا من جوانا للأحسن من غير ما نحس، بتمنعنا عن الغلط، و بتساعدنا بقدرة ربنا إننا نجاهد نفسنا و الجيش اللي بنحاربه ده كله، الصلاة هي عماد الدين و أول ركن من أركان الإسلام بعد الشهاده و أتذكرت في القران كتير قال الله تعالي :
وآيات تانية كتير ،طب هل ربنا هتفيده صلاتنا، لا بالعكس ربنا مش هيفيده إيماننا كلنا ولا هيضره بعدنا عنه كلنا، إحنا اللي محتاجين للصلاة ومحتاجين للقرب من ربنا.
طب إيه اللي النتيجة اللي بتعود علينا من الصلاة؟
هقولك علي 5 حاجات لو عرفتهم مش هتبطل صلاة ولو ماكنتش بتصلي لا قدر الله هتواظب عليها.
أول حاجة : الصلاة هي اللي بتنتشلنا من الهموم والأحزان بنتمنى رزق وفلوس وشغل وجواز وخلفة، بنتمنى صحة وهدوء الصلاة هي اللي بتساعد علي كل ده وبتفتح الأبواب المقفلة.
تاني حاجة: سكينة الروح، زي ما جسمنا محتاج يرتاح وبننام عشان نفصل، الروح بردو محتاجة ترتاح وتهدا وتفصل واللي بيساعدها على ده هي الصلاة؛ لأن الروح بتواجه أزمات وانكسارات وجري على الطموحات والأحلام ؛ قال تعالي و استعينوا بالصبر والصلاة واللي بيساعد علي الصبر علي الازمات والمشاكل هي الصلاة.
تالت حاجة: الصلاة بتغفرلك ذنوبك اللي بتعملها في الوقت اللي بين كل صلاة والتانية وده حديث عن الرسول قال :
رابع حاجة : الصلاة هي اللي بتساعدك تتخلص من ذنب مش عارف تبطله، ماينفعش تقول أنا بتكسف أصلي من كتر ذنوبي؛ لأنك المفروض تتكسف من ذنوبك فتصلي ، ربنا كريم وبيقبلنا وبيفرح برجوعنا ليه ، يعني كل الذنوب الصغيرة بتتغفرلك طب والكبائر؟ جاهد نفسك تتخلص منها وتتوب عنها، ده حتي التائب من الذنب كمن لا ذنب له.
خامس حاجة: الصلاة بتدافع عنك في قبرك لما الملكين ييجوا يسألوك من ربك وما دينك وده السؤال اللي لو جاوبته صح تتفتحلك الأبواب للجنة ولو جاوبته غلط تتفتح الأبواب للنار فالصلاة ساعتها بتساعدك تجاوب صح ، والصلاه هي اللي بتخليك يوم القيامة تشوف ربنا سبحانه وتعالى.
ماتحرمش نفسك من الكنوز العظيمة اللي بتديهالك الصلاة، ماتبعدش عن ربنا عشان ماتتعبش، وماتتسببش لنفسك بسبب مشاغل الدنيا في إنك تخسر الدنيا اللي مشغول بيها دي وتخسر كمان الآخرة مفيش حاجة تستاهل تخسر آخرتك عشانها.
إبدأ من دلوقتي :
لو أنت مش بتصلي إبدأ بالخطوة الأولي المهم تبدأ صلي حتي لو حاسس إنها تقيلة عليك، إبدأ وخليك فاكر إن مكسبك كله فيها تخيل حياتك بعد ماتصلي إزاي هتتحسن، إزاي روحك هتهدأ أكتر من دلوقتي، طبعا مش معنى كده إنك مش هتتضايق يعني لا أكيد هتحصل حاجات تضايق بس هتقابلها بنفس هادية أكتر.
استمر فيها لحد ماتبقى عادة بتعملها ولما تبطلها بتحس إن حاجة ناقصة حتى لو مش حاسس بيها أوي حتى لو مش خاشع فيها بس أهم حاجة الاستمرارية وخليك عارف إن أنت لو عندك أطفال فأنت قدوة ليهم، هيعملوا زيك لو صليت هيصلوا ماصليتش مش هيصلوا وأنت اللي هتشيل ذنبهم، ولو أنت بتصلي فحببهم في الصلاة وماتخليهاش تقيلة عليهم بإتباع أساليب غلط و ربنا يثبتنا ويهدينا كلنا.