كتبت أحلام أبو صالح
الفن حرام أم حلال
جدل بقاله سنين مابين ناس بتقول إنه حلال، وناس بتقول إنه حلاله حلال وحرامه حرام بخلاف الآراء الفقهية وغيرها من الأحاديث، لكن الجدل كان بيزيد لما بيعلن فنان سواء مغني أو ممثل اعتزاله الفن؛ بسبب إنه شايفه حرام خصوصًا لو كان الفنان أو النجم دا شاب صغير، يعني لسه قدامه عمر من النجومية يقدر يحقق فيها شهرة وفلوس كتير، لكن لو النجم دا كبير في السن شوية الناس كلها بتقول عادي أهو بيدور على حسن الختام.
وفي الفترة اللي فاتت فيه ٣ فنانين قرروا إنهم يعتزلوا الفن لأسباب دينية أو زي ما بيقولوا لوجه الله، وكان من أشهر الفنانين دول المطرب الأردني " أدهم نابلسي" اللي كان متألق ومكسر الدنيا بعد ظهوره في برنامج المواهب الشهير " ذا اكس فاكتور"، لكنه قرر إنه هيعتزل الغناء بشكل كامل ومش بس كدا دا كمان مسح كل أغانيه من على اليوتيوب، وسجل القرآن الكريم بصوته ونشر بعض التسجيلات دي على موقع اليوتيوب.
أدهم ظهر في فيديو على قناته وقال:
الفيديو دا عشان أقولكم خبر سعيد بالنسبالي، كل واحد فينا ليه أهداف عاوز يحققها في الحياة، ولكن الهدف الرئيسي لوجودنا في الحياة هو إرضاء وعبادة رب العالمين، مش مشكلة إن يكون عندنا أهداف لكن يكون الهدف دا متناسق مع هدف وجودنا في الحياة، وهو عبادة رب العالمين، أما بالنسبة ليا فالحلم اللى كنت بحاول إن أحققه فهو لا يرضي ربنا ، والحمد لله وبفضله جه اليوم دا واعتزلت الغناء ولكم الشكر على دعمكم، ودي مش هتكون النهاية وأتمنى إنكم تشاركوني رحلتي الجديدة.
وعلى طريقة أدهم نابلسي، أعلن مطرب المهرجانات" فارس حميدة" صاحب مهرجان " مفيش صاحب" اعتزاله الفن بشكل نهائي، على الرغم من إن المهرجان بتاعه كان تريند في الوطن العربي، لكنه فاجئ الجمهور وكتب على حسابه على الفيسبوك، " من غير مقدمات ومن غير كلام كتير والله احنا محتاجين نقرب من ربنا، ونحط وشنا في الأرض ونتذلل ونقوله يارب سامحنا ملناش غيرك، اللهم لا حول لنا ولا قوة إلا بك، يارب احنا ضعاف أمام الذنب، يارب حببنا في الخير؛ لأننا محتاجين نعمل كدا فعلا".
كمان كانت المطربة "زيزي عادل" من الفنانين اللي قرروا اعتزال الفن لأسباب دينية، وقالت إنه خبر وقرار مهم جدًا أخدته في حياتها، وإنه يمكن يكون أهم قرار أخذته في حياتها كلها هو قرار الاعتزال، وكمان قالت أنا أخدت قرار إن أترك المهنة اللي بشتغلها، القرار دا مأخدتوش امبارح دة أخدته من فترة كبيرة جدًا، وأنا مطلعتش أقول الخبر دا لكم بسبب إن كنت حابه أتكلم مع أقرب الناس ليا، والناس دي دعمتني جدًا لما قولتلهم إني قررت اعتزل الفن، وكمان شجعوني إني أعمل كدا، وكملت كلامها وقالت إنها بتبعد عن الفن عشان بتقرب من ربنا، والفترة اللي فاتت قربت جدًا من ربنا، وكمان أدركت إن القرآن بيقول إنها لازم تكون ست ملتزمة وبتحاول على أد ما تقدر إنها تكون ملتزمة.