كتبت : أية أبو النجا
هل تعرف إن الشاي ده تاني أكتر مشروب في الاستهلاك بعد المايه ؟ طب وانت قاعد بتذاكر وعاملك كوباية شاي أو وانت قاعد مع واحد صاحبك على القهوة وبتشربوا كوبايتين شاي عمر خطر على بالك في مرة إن في دول وناس عملوا حروب وثورات وصراعات عشان الشاي اللي قدامك علي الترابيزة ده.؟
أيوه الجملة مظبوطة وانت قرأت صح .. انت متخيل إن في حرب وثورة قامت عشان الشاى اللي انت بتشربه، لأ وكمان في حزب في إسمه حزب الشاي.؟
الحكاية بتبدأ من عند سنة 1767 لما كانت بريطانيا محتلة أمريكا ، وقام " تشارلز تاونشند" المستشار المالي لبريطانيا عمل قانون ينص على : ( فرض ضريبة جمركية على كل السلع المستوردة) ، وده عشان إن العائد منها هيكون مرتبات لحكام المستعمرة البريطانية.
طب هو إيه علاقة الشاي بالقانون ده ؟
جايلك في الكلام أهو .. الموضوع وما فيه إن القائمة اللي هيتم فرض الضريبة عليها كان الشاي من ضمنهم وده اللي خلى إن الأمريكان يعملوا ثورة.
ثورة الشاي
ودي حصلت بسبب إن القانون عمل بركان غضب جوا كل سكان المستعمرة الأمريكية، وعشان يعبروا عن كده نظموا حملات شعبية لمقاطعة الشاى والامتناع عن شربه وبدأوا يشربوا الشاى الهولندي اللي بيتم تهريبه لداخل المستعمرة، وده طبعًا اتسبب لشركة الهند الشرقية في خسائر كبيرة جدًا وعمل ليهم أزمة ، فقام البرلمان البريطاني عمل "قانون الشاي" عشان ينقذ شركة الهند الشرقية ، وطبعًا الكلام ده زاد الطين بلة والأمريكان غضبوا أكتر ، وقامت معركة ما بينهم وبين البريطانيين ومات فيها 5 أشخاص من الأمريكيين واتعرفت بـ "مجزرة بوسطن" ؛ ومن هنا بقي اتحول بركان غضب الأمريكان إلى أعاصير وشلالات من الغضب والانتقام.
حفلة شاي بوسطن وحرب الاستقلال
في سنة 1773 لما كان في سفينة بريطانية محملة بشحنات كبيرة جدًا من الشاى وقفت في ميناء بمدينة بوسطن في أمريكا فقام ساعتها مجموعة من الثورجين الأمريكيين بالتنكر في شكل عمال الميناء، وطلعوا السفينة وفضوا علب الشاى كلها في البحر إنتقامًا من بريطانيا وعشان كده الحادثة دى اتعرفت بـ " حفلة شاى بوسطن " ، وكانت زي كف نزل على وش الامبراطورية البريطانية وده اتسبب في غضبهم أكتر وخلاهم يقرروا القبض على كل الثورجية اللي في مدينة "يورك " ، وده كان رد الفعل على اللي هما عملوه عشان ده ميتكررش تاني وكانوا مفكرين إن بكده هيخافوا لكن الدنيا قامت ومقعدتش لأن بسبب القرار ده الموضوع كبر مع الأمريكان ووصل لحرب حصلت مابينهم كان نهايتها هزيمة بريطانيا.
وبريطانيا كان لازم ترد اعتبارها طبعًا .. إنت فاكرها هتسكت ولا إيه ! ؛ فقامت بحرق البيت الأبيض ومقر الكونغرس الأمريكي ، وبعدها حصلت مظاهرات كتير من الأمريكان ومطالبتهم بالإنفصال عن بريطانيا، واستمرت الحرب مابينهم لمدة 8 سنيين .. الأمريكان كبروا الموضوع جدًا وكل ده عشان الشاي.!
وإنتهت الحرب بأن كوباية الشاى إللي انت قاعد بتشربها كانت ليها دور في استقلال أمريكا؛ وبسبب المناسبة دي كتب "فرانسيس سكوت كي " قصيدته " راية تزينها النجوم " إللي بقت النشيد الوطني لأمريكا لحد النهاردة ؛ لأ وكمان اتعمل حزب في أمريكا إسمه "حزب الشاي"، تخليدًا للذكرى اللي تعتبر الحدث الأهم عندهم ، وبالرغم من إنه حزب كبير وليه مكانته وهيبته " لكن ماهو إلا حزب رمزي" وملوش أي دور سياسي ولسه لحد دلوقتي الحزب ده موجود.
دخول الشاى مصر
الشاي دخل مصر في سنة 1911 وكان اللي بيشربوا طبقة الأمراء والأعيان بس ، إنما مكنش يعرفه المواطن المصري البسيط لحد ماحصلت الحرب العالمية الأولى وشارك فيها المواطن البسيط والفلاحين ، وده كان السبب في إنه عرف الشاى ومش بس كده ..لأ وكمان أدمنه.
فتم إصدار قرار من الحكومة بمنع استيراد الشاى لأنه بيتسبب في ضرر للفلاحين اللي بيشربوا أكتر من كوباية في اليوم ؛ بس القرار اتقال من هنا وتم إستيراد الشاي مرة تانية لأنه خلاص بقى مشروب مقدس عند المصريين وأتحول من مشروب عادي إلى أنه وصل لدرجة الإدمان ، وبقى لازم بعد أي أكلة يشربوا كوبايه شاى، ومن كتر حب المصريين في الشاي تفننوا في صنع الأباريق ، وكمان قاموا بكتابة أغاني شعبية عنه زي أغنية " الشاي على النار، وإبريق الشاي وغيرهم كتير."