كتبت : ايمان توفيق
مقدمة للشخص الصح
كلنا عارفين إن كل واحد فينا مختلف عن التاني وله صفات وطباع وشخصية مختلفة، ولكل واحد النص التاني اللي يناسبه مع إن كلمة النص دي كلمة غلط؛ لأن إحنا مش انصاص عشان نحتاج لحد يكملنا بس المقصود بكلمة النص التاني فهو الشخص اللي بيجملنا مش بيكملنا؛ لأن إحنا بنبقى عايزين حد يقوينا ويدعمنا ويفهمنا ويتقبل ضعفنا و يتقبل إننا أوقات بنبقى فاقدين الشغف ومش قادرين نقوم من على السرير حرفيًا و معندناش طاقة حتى نتكلم.
الشخص الصح هو الشخص اللي ربنا خلقه على مقاسك بالظبط، مناسب ليك، و متوافق معاك كأنكوا قطعتين من قطع الـ puzzle اللي بتركب على بعض فبتتوافقوا أوي.
صفات الشخص الصح
- الشخص الصح هتحس معاه إنك قادر تبقي على طبيعتك؛ لأنك عارف إنه مش هيحكم عليك و لا هيشوفك بعين الناس التانية لا هو هيشوفك بعين مميزة و هي عين المُحب اللي هتحبك في كل حالاتك، وبالذات وأنت في أسوأ حالاتك لأن ده أصدق أنواع الحب.
- الشخص الصح هو الشخص اللي هتحب نفسك وأنت معاه لأنك هتشوف نفسك قد إيه حلو بعيونه وهتثق في نفسك وقدراتك أكتر و هيطلع أحسن نسخة من شخصيتك.
- مش هيغير من نجاحك حتى لو بقيت أنجح منه بالعكس هو إنسان سوي نفسيًا هيشجعك ويلهمك ويديك طاقة كل ما تكسل، إنك تقوم وتكمل.
- بالتالي الشخص الصح مش هيقف في طريق أحلامك ولا هيكون عقبة فيها أيًا كانت أحلامك دي إيه المهم إنه هيشجعك توصل لها وهيكون داعم ليك وملهمك في كل الخطوات.
- الشخص الصح هيهتم بتفاصيلك وكل حاجة تخصك وهياخد باله كويس من الحاجات اللي بتحبها ويعملها والحاجات اللي بتضايقك هيبعد عنها عشان ما يتسببش ليك في أي أذى.
- بيكون طموح وبيحب دايما يطور نفسه و يزود معلوماته و من كتر طموحه هتتعدى منه وتبقى أنت كمان حاسس إنك عايز تتحرك وتقوم حالًا تعمل حاجة وتطور من نفسك.
الشخص الصح في الخلافات
عمره ما هيقلل منك ولا يهينك بالعكس هيكون محترمك حتى في عز اختلافكوا وده هينقلنا لنقطة إنكوا بتعرفوا تختلفوا ؛ لأن العلاقة الصح مش هي العلاقة اللي مفيهاش مشاكل خالص، لا هي العلاقة اللي بتعرفوا فيها إزاي تتخانقوا بهدف الإصلاح وإيجاد حلول من غير ما حد يجرح التاني أو يعايره أو يكسره ويسيبله جروح في روحه حتى لو خفت، فهي هتفضل سايبه أثرها بندبات تفضل لآخر العمر مش هتروح ومش هيقدر ينساها.
بتطلعوا من كل خناقة ومشكلة علاقتكوا أقوى وأحلى وأنضج و تحبوا بعض أكتر مع كل خلاف؛ لأنكوا بتعرفوا قد إيه قيمتكم عند بعض عالية وكبيرة مع كل خلاف.
وهتعرف تتناقش معاه في أي موضوع أو فكرة تيجي في بالك من غير ماتخاف؛ لأنه مش بيحكم رأيه أو بيسعى لكسب النقاش ولا بيسعى يثبت وجهة نظره فيجادل جدال فارغ وخلاص، لأ هو بيحترم رأيك وبيهتم بيه وبيعمل الأصلح بعد ماتكونوا أنتوا الاتنين راضيين عن القرار اللي هتوصلوله فمش هتحس بالقهر معاه أو إن حقك متاخد منك.
صفات أخرى
- الشخص الصح هيهتم إنه يسمعك وهيحب يركز معاك ومع تفاصيلك وتعبيرات وشك واحساسك و أنت بتحكي ومش هيزهق مهما طال الوقت.
- هيتحمل مسؤولية أخطاءه ولما يغلط هيقولك أيوه أنا غلطت أنا آسف وهيحاول فعلًا مايكررش غلطته تاني، ومش هيبقى عنده تكبر ولا شايف إنه معصوم وده هيشجعك إنك أنت كمان لما تغلط تعترف بغلطك بكل أريحية؛ لأنكوا متقبلين إن عادي كلنا بنغلط.
- الشخص الصح مش هينتقدك عشان يكسرك.. لا هو لو عايز حتى يلفت نظرك لحاجة هيكون رحيم وهينتقدك انتقاد بنَّاء وهو موصلك احساس إنه قابلك وبيحبك، والانتقاد ده ماهو إلا عشانك أنت عشان تبقى كويس وتبان أجمل.
- الشخص الصح هيكون حنين عليك في عز ما الدنيا تقسى و تيجي عليك هيكون هو الإيد اللي تطبطب وتحن عليك فمش هتحس بقسوة العالم وأنت معاه.
- هيوفي بوعوده ليك مهما كانت صغيرة؛ لأنه مدرك إن خذلان العشم حتى في أصغر الأشياء مؤذي.
- هتتبسط معاه سواء أنتوا في أغلى مطعم أو قاعدين على الكورنيش بتاكلوا ترمس أو بتتمشوا؛ لأن أنتوا بتتبسطوا مع بعض على أي حال وده ينقلنا لنقطة إنك بتبقى سعيد وأنت معاه سواء كنتوا ساكتين بتتأملوا في المنظر اللي قدامكوا، بتتكلموا، بتاكلوا، أو بتلعبوا وهتضحك من قلبك معاه بعد ما كان الضحك من القلب بقاله كتير ناسيك، وهتستمتعوا في كل الأوقات ومش هتحب تعمل حاجة من غيره؛ لأن حلاوتها بتكمل بوجوده.
- الشخص الصح هو الشخص الصادق اللي مش هيكدب عليك في مشاعره و لا في كلامه حتى لو كان اللي هيقوله ممكن يسبب مشكلة زي إنه يحكيلك على حاجة غلط عملها مثلًا بس بردو هيقولها؛ لأنه مش حابب يخبي أي حاجة عنك.
- وطبعا مش خاين ومابيفتحش أصلًا الباب للموضوع ده إنه يبدأ هتكون أنت مالي عينه، وقلبه وهيكون مش محتاج ولا عايز حد غيرك ولا هيشوف حد غيرك حتى لو كان بمنظور العقل أحسن منك في أي شيء.
الأمان وعدم الشك
- الشخص الصح هتحس معاه بالأمان دايما هتكون متأكد إنه جمبك و عمره ما هيسيب إيدك ويمشي، أو يغدر بيك وهتبقى متأكد إنك لو حصلت معاك أي مشكلة هو أول واحد هتجري عليه تقوله، وتبقى متأكد إنه هيتصرف باللي يقدر عليه حتى لو كان تصرفه ده مجرد إنه بيسمعك وبيهون عليك بكلامه مش هيسيبك في نص المشكلة ويجري.
- مش هتشك للحظة واحدة إنه بيحبك؛ لأن أفعاله وكلامه طول الوقت هيثبتلك مدى حبه ليك وصدق احساسه.
- الشخص الصح مش هيسمح لأي حد إنه يتدخل أو يوقع بينكوا، هيصده و هيقف يرد عليه ومش هيتهز لحظة.
- في النهاية فالشخص الصح هو الشخص اللي هتكون مرتاح معاه، ومش قادر تتخيل إنك ممكن تكمل حياتك من غيره، وهو الشخص اللي هتكون معاه بنفسك الحقيقية الحلوة المرحة اللي مش محتاج تجملها أو تتصنع حاجة مش موجوده فيك؛ لأنك عارف إنك مقبول بكونك أنت، أنت وبس.
والصفات دي كلها فيه منها صفات أساسية لازم تكون في حياتك وفيه صفات تانية لو مش موجودة تقدر تكمل من غيرها عادي، وتتقبل ده فأنت اللي تقدر تحكم فدور دايما على الشخص الصح بالنسبالك اللي تلاقي راحتك أنت معاه، تلاقي نفسك معاه و تحب نفسك معاه و اسعي دايمًا بردو عشان تلاقي الشخص الصح إنك تكون أنت كمان أصلا شخص صح.