كتبت: إيمان توفيق
اللي أنت تعرفه أحسن من اللي أنت ماتعرفوش:
فيه مقوله مشهورة أوي بتقول إن اللي أنت تعرفه أحسن من اللي أنت ماتعرفوش وزيها زي بقية الأمثال بناخدها كواقع مسلم بيه من غير ما نفكر، خلاص هي حكمة أو مثل، ورثناها من المجتمع أو من أهلنا أو أيًا كان مين، و دخل سيستم عقلنا، و اتثبت فيه من غير إرادتنا، ومن غير وعي.
بس تعالى نفكر مع بعض شوية هل فعلًا اللي نعرفه أحسن من اللي مانعرفوش؟
يعني نفترض إن أنت عايز تعمل مشروع وعايز شريك، و قدامك اختيارين يا تختار قريبك أو حد غريب يشاركك مين اللي هتختاره تلقائيًا ؟ أكيد هتختار قريبك وهتقول ده عارفه وحبيبي وأحسن من الغريب ده لو ماكنتش مؤمن بمبدأ إنك ماتشاركش قريبك أحسن عشان لو حصل حاجة ماتخسروش يعني.
بس هل بقا الأكيد إن قريبك ده هيكون أحسن دايمًا؟
لا طبعا، مش شرط يكون أحسن وممكن الغريب يبقى أحسن منه مليون مرة فلو فكرت شوية بناءًا على شوية معايير من غير ماتتسرع هتلاقي مثلا إن قريبك ماعندوش خبرة في الشغل ده لكن الغريب ده عنده، قريبك معندوش مهارة معينة في المشروع ده بس الغريب ده عنده، قريبك مش طموح وعايز أي شغل يشتغله وخلاص مش فارقه لكن الغريب طموح وبيحب المجال ده أصلا وبيطور نفسه فيه، ساعتها لو فكرت كده هتختار الغريب مع شوية احتياطات وإجراءات زيادة شوية تضمن حقوق كل واحد فيكوا تجبنًا للنصب أو إن أحيانًا الفلوس بتغير النفوس يعني.
وكذلك بقا لو جيت تستشير حد في حاجة ليك، مشكلة مثلًا أو قرار عايز تاخده، ليه بتلجأ للقريب؟ عشان اللي نعرفه أحسن من اللي منعرفوش؟
لا في دي كمان اللي مانعرفوش أحسن لأن في أي وقت لو اختلفت مع الغريب ممكن تبعد ومايعرفش يوصلك لكن القريب ماتقدرش تتبرأ منه لأن فيه صلة رحم بتربطك بيه.
مش دايما هتطلع عارفه
في كمان سؤال مهم لازم تسأله لنفسك و هو إن هل اللي أنت بتقول إنك تعرفه ده أنت أصلا متأكد إنك تعرفه ؟
مش أحيانًا بيحصل موقف بينك وبين حد تعرفه، و بتحس ساعتها إن أنت أول مره تشوف الشخص ده كأنك ماتعرفوش، ماكنتش تتوقع منه كده؟
قيس على ده أي حاجة بقا فماتخليش معيارك إن اللي نعرفه أحسن لأن مش دايما هتطلع عارفه وحط معايير تانيه زي إن ده أفضل أو بيفهم أكتر أو أمين أكتر وهكذا؛ لأن للأسف في الزمن ده أنت ممكن تلاقي القريب هو اللي بيستغلك وبيدبرلك مكايد ومابيحبش الخير ليك، ممكن يكون بيحسدك وباصصلك في حياتك إلا من رحم ربي طبعًا، وعلى الجانب التاني تلاقي حد غريب بيحبك جدًا وعايز مصلحتك أكتر من القريب وخايف عليك بجد فللأسف مفيش قاعدة عامة و الأمثال اللي زي دي لو فكرنا فيها شوية بس هنلاقي إن فيه كتير منها مالوش أي أساس من الصحة ومجرد معتقدات مغلوطة، فحرر نفسك من كل الأفكار الغلط دي عشان تعرف تعيش بشكل أفضل.