كتبت آلاء مصطفى
على فكرة أنت مش دايمًا بخير، أنت مش دايمًا كويس زي ما الناس شايفه، الأوقات الكتير بتكون عكس ماتبدو، الصورة الحلوة جايه بعد ٣ شهور في البيت اكتئاب وزعل ؛ الخروجه الجميلة جايه بعد أيام بطولها بتخلص شغل، وإرهاق وتعب فأنت عكس ماتبدو.
الضحكة الجميلة دي جايه بعد سنين وسنين من الابتسامة اللي حلت محلها، عشان مفيش حاجة في السنين دي جات تضحكك من القلب فأنت عكس ماتبدو.
السفرية الجاحدة لبلد جميلة جايه بعد سنتين بتحوش فيهم علشان تطلعها ..الحب اللي مفيش زيه، صور خطوبتنا وفرحنا، متعة حياتنا اللي بنشاركها دايمًا على السوشيال ميديا، نص الرواية مش كلها.
دايمًا بنشارك الناس الجزء الحلو مش عشان مفيش في حياتنا غير الحلو لا، عشان مش حابين غيرنا يشوف الوحش، عشان باختصار مالوش ذنب فيه علشان كدا احنا دايمًا عكس مانبدو، مش أنت بس كلنا حياتنا شيء والجزء اللي بيطلع للميديا شيء تاني.
عشان كدا متحسدش حد على حياته، عشان أكيد فيها جزء سيئ أنت متستحملوش.
كملي ربنا معاكي كلامك كلو صح
ردحذف