كتبت أيه أبو النجا
في أي بلد الناس بتورث من أجدادها فلوس ودهب وأراضي ، لكن الميراث في مصر مش بس فلوس وملايين ، وإن العادات والخرافات اللي سابها جدودنا وجدود جدودنا دي ميراث كمان.
بنسلمه من جيل للتاني ومصدقين كل خرافة ومؤمنين بيها من غير ما نعرف أصل العادات دي ولا بدايتها ، وإيه السبب في إنها تكون موجودة أصلًا.
في تجربة علمية بتوضح إن ليه حاجات زي الخرافات بتنتشر بسرعة ما بين الناس ، والتجربة دي عملها مجموعة من علماء النفس وهي إنهم جابوا مجموعة من الأشخاص وقعدوهم مع بعض في عيادة ، وخلال فترة انتظارهم للدكتور كان بيرن جرس فبيقوموا كلهم يقفوا وبعدين يقعدوا.
ولما جه شخص جديد لسه داخل كان بيستغرب في الأول اللي هما بيعملوه ، لكن بعد كده بدأ يعمل زيهم تلقائي ، وبعد ما كل الناس مشيت ، والشخص الجديد ده هو اللي لسه لوحده فضل برضو يقوم يقف ويقعد زي ما كانوا بيعملوا.
ولما كان بيدخل أشخاص جديدة ويلاقوا الشخص ده بيعمل كده فتلقائي بدأوا في تقليده برضو ، وده بيوصل إن الخرافات بتتنقل من الجيل القديم للجيل الجديد تلقائيًا ، وده بسبب إن اللي قابلك كانوا بيعملوا كده وأصبحت عقيدة ولازم تتعايش معاها من غير أي استفسار.
وممكن يكون إتباعنا للخرافات ده بيرجع لأننا شعب متشائم بطبعه ، وأسهل حاجه عندنا إننا بنعلق أي غلطه على شماعة " الحظ النحس والفال الوحش" .. يعني مثلاً لما معرفتش تحل في الامتحان ، ده ماكنش سببه إنك كنت فاتح المقص بليل ، ولا إنك وأنت طالع الصبح شوفت بومة في الطريق.
وأسطورة الخرافات إتزرعت من أيام القدماء المصريين ، وفضلت موجودة لحد دلوقتي وكأنها تراث ومينفعش يتغير... زي مثلاً :
أسطورة رفة العين
ودي دليل على إن عينك الشمال لو بترف يبقى في حاجه وحشه هتحصلك ، أما لو كانت عينك اليمين فأبشر وفي أخبار سارة جيالك في السكة.
ودي بقي من أغرب الأساطير اللي اتقالت وده بسبب إن ماكنش في أي تفسير منطقي ولا في علاقة لا من قريب ولا من بعيد ما بين رفه العين والفرح والحزن ، وإن بديهي كده ليه ما يكونش تفسير ده بسبب قلة النوم والسهر وإنك محتاج تضبط نومك.
صفير الأذن
ودي بقى الخرافة التوأم للعين وده لأنها شبهها جداً ؛ بمعنى إن لو ودنك اليمين لاقيتها بتصفر يبقى في حد بيقول في حقك كلام حلو وبيشكر فيك ، وكمان كاتبلك قصيدة مدح وقاعد يقولها للناس.
أما بقي لو كانت ودنك الشمال فمعنى كده إنه قاعد يغلط فيك في غيابك ويتكلم عنك بالوحش ، واستبعدنا برضو تفسير المنطق اللي بيقول إن ممكن ده يكون نتيجة التهاب في الأذن أو ارتفاع ضغط الدم.
أسطورة امسك الخشب
والأسطورة دي بقى مرتبطة بالحسد والفال الوحش ؛ بمعنى إن لما يكون حد خايف من الحسد تلاقيه بيقولك يا عم امسك الخشب.
ما تعرفش إيه علاقة الخشب بالحسد أو إيه العلاقة ما بين إن لما الشخص ده يمسك الخشب فهو كده مش هيتحسد ؟
الحكاية بدأت من عند الإمبراطور اليوناني قسطنطين اللي كان في عهده المسيحيين لما بيمشوا في مواكب في الشارع كانوا بيبقوا ماسكين صليب خشب كنوع من أنواع المباركة ، بس ده بشرط أن تلمس الصليب 3 مرات ، لو 2 لا مش هينفع.
وبعد كده الموضوع بدأ ينتشر لحد ما بقى عادة عندهم وبقى يعملها أي حد مش بس المسيحين لا وكمان المسلمين ، ده حتى الأجانب كمان بيقولوا جمله "Touch wood " عشان الفال الوحش.
نروح بقي لأسطورة الأساطير اللي احتلت المركز الأول في الشهرة وهي :
دلق القهوة خير
هو هل فعلًا الخير محتاج يعلن عن وجوده بدلق القهوة؟ ، وليه مش دلق الشاي أو الينسون ، وإشمعنا دلق القهوة خير مش شر ؟
بداية الحكاية كانت زمان في قصر واحد غني وكان عنده راجل قهوجي اسمه " خير " وده كان المسؤول عن تقديم القهوة للضيوف ، وفي مره وهو بيقدم القهوة لشخص دلقها عليه غصب عنه.
فساعتها الراجل قال ( دلق القهوة خير ) وكان قصده خير اللي هو اسم الشخص ، مش خير اللي هي الصفة ، لكن الناس خدوها كصفة ومن ساعتها اشتهرت مقولة إن دلق القهوة خير.
أسطورة رش الملح
طبعًا كلنا عارفين إن الملح بيترش على الأكل لكن في خرافة بتقول إن الملح بيترش على العريس والعروسة في الأفراح ، وده عشان اليوم يعدي على خير.
وبداية الخرافة كانت في العصور الوسطى لما كان الملح من السلع الغالية جدًا ، وكمان كان بيتم استخدامه في العلاج ، وبسبب اللي حصل في أحد المدن الأوروبية اللي كانت بتاجر في الملح وبتكسب منه كتير وأصبحت أغنى مدينة ، ولما وقفت الإنتاج والتجارة في الملح بقت مدينة فقيرة جدًا ، فإتقال إن قله وجود الملح بيجيب الفقر.
بس عندنا هنا خدنا القصة دي بشكل تاني خالص وهو إن الملح بيترش كنوع من أنواع الحماية وطرد الأرواح الشريرة ، ومنع الحسد وسوء الحظ.
رش المية عداوة
اللي يرشنا بالميه نرشه بالدم … حكاية الجملة بدأت زمان في حي شعبي لما كانوا بيملوا الشوارع بالميه في فض أي عاركه أو خناقة.
بس الموضوع تطور وبقى وسيلة "جر شكل اللي قدامك" ، زي واحدة قامت رشة ميه الغسيل على جارتها وهي ماشية في الشارع فهيقوم بينهم خناقه كبيره ، وبسبب كده ارتبطت رش المية بالعداوة.
كل اللي فات حاجه لكن اللي جاي ده حاجة تانية عشان ده الجانب المرعب في الخرافات زي أسطورة :
الشبشب المقلوب
بيمنع دخول الملايكه البيت ، ولما الشبشب يكون مقلوب الدنيا كلها بتتقلب ، وبيحصل في البيت مشاكل كتير وخناقات وحزن.
وكمان إتقال إنه حرام يكون الشبشب مقلوب بسبب إن تم اعتماد الشبشب كأداة من أدوات السحر ، وده بسبب قصه الشبشب اللي بتقول إنه نوع من أنواع السحر السفلي اللي بيتعمل لما يكون في واحدة عاوزه واحد معين يحبها ، وعشان كده الناس لما بتلاقي حد بيحب واحدة لدرجة الجنون ساعتها بتقول جملة واحدة بس (دي سحراله )
وفضل البعض يقول إن الشبشب المقلوب حرام بالرغم إن مفيش حديث ولا آيه قرآنية بتقول كده ، وكمان دار الإفتاء قالت إن ده مش حرام.
" المقص المفتوح "
وهنا بقي بيتقال إن لو فضلت تفتح وتقفل في المقص كتير ، فـ زي ما أنت عارف إن لكل فعل رد فعل ؛ ورد الفعل على عملتك دي إن المكان هيحصل فيه كوارث ، ده غير كمان إنك جبت لنفسك المشاكل والحظ الوحش.
أما بقي " خرافه الكنس بالليل " إتقال إنه حرام عشان بيزعج الملايكه ، إعتقادًا إنهم زي البشر وده مش صحيح... وكتير من أساطير الخرافات اللي ملهاش أول من آخر.