كتبت : شهيرة السيد
كلنا بنشوف و نسمع عن محل للإيجار ، شقة للإيجار.
لكن عمرك سمعت عن شخص للإيجار !!!
" شوجي موريموتو " عنده 37 سنة من طوكيو في اليابان ؛ بـيأجر نفسه مقابل عشر آلاف ين ، يعني حوالي 70 جنية إسترليني أو 100 دولار أمريكى تقريباً.
الموضوع ده بدأ معاه لما نشر تويته كتب فيها ' أنا أعرض نفسي للايجاركشخص لا يفعل شيء' ؛ محتاج حد ينزل معاك تعملوا شوبينج ، حد يحجز لك مكان ، خارج و مش لاقي حد يخرج معاك ، مش لاقي حد يشاركك فنجان قهوه في صمت ، حاسس بالوحدة و مش لاقي حد يونسك.
في الأول كان بـ يعمل ده بدون اي مقابل مادي ، ولما لقى الطلب عليه زاد بقي بـ ياخد أجره علشان يخفف الطلب من عليه شوية.
بيقول إن أغلب الناس اللي بيأجروه بيعانوا من الوحدة و الملل ، و في ناس بـ تأجره علشان بس يقعد معاهم يسمعهم ، وناس أجروه علشان يصورهم ؛ و من المواقف الغريبة إن في راجل اتصل بيه يحكيله عن جريمة قتل ارتكبها.
والغريب انه بعد 3 سنين بقي عنده حوالي 3000 زبون ، و يستقبل من 3 ل 4 طلبات ف اليوم ؛ و بقى بيألف كتب عن مهنته ، و عنده أكتر من نص مليون متابع على السوشيال ميديا.