كتبت أية أبو النجا
عُمرك جربت في مرة إنك تكون ماشي في الطريق وبدون أي مقدمات تقوم واقع مكانك ونايم ؛ ممكن يتقال إن دي غيبوبه أو إغمي عليك ، لكن أحب أقولك إن دا " مرض النوم " لإن الكلام ده ما بيحصلش لشخص واحد ، دى ( نوبة نوم جماعيه ) بتحصل لكل أهل القرية وبتستمر لمده 3 أو 6 أيام يعنى إنت وحظك.
"مرحباً بك إنت الآن في قريه كالاتشي" بين قوسين القرية النائمه.
تقع قريه كالاتشي في كازاخستان .. والموضوع بدأ في 2010 لما ظهرت أول حاله وهي " ليبوف لا يبوكا " لما وقعت فجأه على الأرض وهي بتتكلم مع أصحابها ، وحولو يفوقوها ولكن معرفوش.
وإتنقلت للمستشفى والأطباء حاولو في إكتشاف السبب ، أو إنهم يفوقوها و لكن كُل محاولاتهم فشلت برضو ؛وفضلت نايمه لمده 4 أيام وصحت لوحدها.
وفي 2014 كان في واحد من بره سكان القرية إسمه " فيكتور كازاشنكو " رايح لمنطقه قريبه من قريه كالاتشي ، عشان يخلص شغل هناك ، لكن صابته لعنه النوم المفاجئ وصحي بعد كذا يوم ، ومش فاكر أي حاجه خالص غير إن إتوقف عقله فجأة.
والغريب إن نوبات النوم المفاجئة بدأت في الإنتشار ومبقاش شخص واحد أو إتنين أو حتى تلاته ، ده بقى سكان المنطقه كلها.
ودا يخلينا نروح لـ أغرب حادثة حصلت في 2014 لما فصل كامل في مدرسه وهما بياخذو الحصه دخلو في نوبة نوم إستمرت لمده يوم كامل ، ولما فاقو ، بعضهم قال إن خلال النوم شاف هلاوس زي إن الدنيا مطرت تلاجات ، والفيلة دخلت الفصل و قعدت تحضر معاهم الحصة.
وكُل اللي فات دة كوم وإللي جاى كوم تانى لإن الأغرب من كل ده بقى إن في مجموعه من الأشخاص لما سمعو عن اللي بيحصل قررو مساعده أهل قريه كالاتشي ودخلو القريه وجالهم مرض النوم ؛ " قال جبتك يا عبد المعين تعينى لقيتك إنت اللي عايز تتعان."
تقدر تقول كده إن لعنة " كالاتشي " صابت أهل القريه ، والمجموعه إللي جات تساعد أهل القريه وأي حد معدي جنب القريه ، وكمان حيوانات القريه.
لأن إتقال إن قطط القريه هي كمان صابها نوبه النوم زي الأهالي ، بس في اختلاف ما بينهم إن القطط لما بتفوق من النوم بتكون في حاله وحشيه غريبه جداً فـ وسع لتتعض.
و بسبب كده بدأ يتم تشخيص لمعرفه سبب إللي بيحصل ، ولكن الغريب إن الفحوصات الطبية ، و وزاره الصحة بنفسها أثبتت إن مفيش أي فيرس أو عدوى.
فـ اتقال إن السبب هو مناجم اليورانيوم إللي موجودة في قريه كالاتشي ، وده خلى العلماء يعملوا تحليل عشوائي (للتربه و المياه و دم السكان) ؛ بس كُل العينات نفت وجود أي إشعاع نووي بالمنطقة ، لأن النتيجة طلعت طبيعيه.
ولكن بعض العلماء قالوا إن السبب الحقيقي هو إن القريه عشان كانت قريبه من منجم يورانيوم سام ، و بسبب غاز الرادون الناتج عن غاز الراديوم أهل القريه جالهم مرض في الدماغ نتيجة زيادة سائل في المخ ، وهو دة إللي بيخلي نوبة النوم تحصل علي فجأة.