![]() |
بداية فستان الفرح |
لونه الأبيض ورث من العصر الفكتوري !.. بداية فستان الفرح ومراحل تطوره عبر العصور
كتب: أية أبو النجا
مجاش في بالك قبل كده تسأل نفسك عن حكاية فستان الفرح وإزاي بدأ و ليه لازم إجاره يبقى بمرتب 3 مواظفين ! و ليه يبقى بحجم القاعة و أنتي كعروسة مابتبقيش عارفة تمشي والعريس يعيني هو كمان مابيبقاش عارف يمشي وتشريح جسمه بيأخذ شكل جيبونة الفستان؛ وعشان كده هنعرف من كوكب الإعلام تفاصيل الحكاية.
حكاية فستان الفرح الأبيض بدأت من 200 سنة في إنجلترا بس قبلها مر بمراحل تطور في كل عصر لحد ما ارتبط باللون الأبيض و بقى تقليد ثابت.
مراحل تطور فستان الفرح عبر العصور
1- العصر القديم : الفستان كان ماهو إلا رمز للبساطة ووقتها العروسة كانت بتلبس أي فستان وأي لون " اللي على مزاجي هلبسه ".
2- العصور الوسطى : تحديدًا من القرن الخامس لحد القرن الـ 15 ميلادي بقى اسمه عصر اللي يعرف يعلي على التاني يفرجني ، وكان الفستان وقتها لازم يكون مصنوع من الحرير والفرو وبيتم تزيينه بالأحجار الكريمة وكان لون الفستان مش أبيض ده كان في أكتر من لون زي الأخضر والأحمر والأصفر وبالرغم من إن في أكتر من لون بس اللي كان منتشر أوي ساعتها هو اللون الأزرق وده بسبب إن الناس وقتها قالوا إن الأزرق بيعبر عن النقاء.
3- عصر النهضة : اللي كان مشهور فيه وقتها موضة فستان الفرح الطويل و لونه "بورجندي" .. أيوه أنت قرأت صح ماتعرفش ده لون ولا اسم دولة ؛ واللون ده كان غير مفهوم ماتعرفش هو أحمر ولا بنفسجي عامل زي الحرباية بيتلون ، وفضلت الموضة دي منتشرة لحد القرن الـ 17.
4- عصر التنوير : في القرن الـ 18 طلعت فيه موضة عند الطبقة المتوسطة وهي إن مش شرط الفستان يبقى جديد والعروسة تلبس أحلى فستان موجود عندها وخلاص ومفيش بقى تفصيل ولا تأجير.
5- العصر الفيكتوري: مع بداية مجئ القرن الـ 19 انتهت موضة التنوير وبدأت موضة فيكتوريا اللي هي ملكة انجلترا اللي في فرحها لبست فستان لونه أبيض ومصنوع من الدانتيل والحرير والستان ؛ وسبب اختيارها للون الأبيض كان عشان تظهر تفاصيل الفستان.
موضة اللون الأبيض
وفيكتوريا طلت بالأبيض من هنا وفستان الفرح الأبيض بقى موضة وبالأخص مابين الطبقة الغنية ، وده لأن من ساعة الفرح والفستان الأبيض ارتبط بالملكية.
6- عصر التكنولوجيا : تحديدًا في نص القرن العشرين انتشر الفستان الأبيض مابين كل طبقات المجتمع ومبقاش فيه فرق مابين فقير وغني و ده بسبب إن صناعة الملابس تكلفتها بقت قليلة.
وبقى لازم الفستان يبقى لونه أبيض لأنه بقى من التقاليد ، وتحديدًا بعد فرح الأميرة "ديانا" لإن الفترة اللي بعدها انتشر الفستان الأبيض في الأفلام والسينما بطريقة كبيرة جدًا.
فالموضوع ماهو إلا تقاليد وورث ، يعني ماينفعش عروسة تروح تلبس فستان الفرح لونه برقوقي .. أتكفري بتقاليدنا أيتها العاقة الصعلوكة ، وماينفعش برضو تجيب حاجة بسيطة ولازم الفستان يبقى بحجم القاعة عشان زي ما ورثنا اللون الأبيض من العصر الفيكتوري فـ ورثنا برضو من العصور الوسطي اللي يعرف يعلي على التاني يتفضل يعلي.
اقرأ أيضا: عبادة الفتيات الصغيرات في نيبال