![]() |
كواكب تمطر زجاج و ماس |
الفضاء مليان بالعجائب ، و الاكتشافات ما زالت مستمرة و لكن أنواع الكواكب اللي هنتكلم عنها هنا دي أغرب من الغرابة.
كواكب تمطر زجاج و ماس
كوكب gliese 436-b
هو عبارة عن كتلة من الثلج؛ و ده لأن الكوكب قريب من النجم اللي بيدور حواليه لدرجة تخليه مشتعل طول الوقت بدرجة 439 درجة مئوية، و لو سألتني إزاي كوكب من الثلج و مشتعل و الثلج مش بيسيح؟
هقولك لأن جاذبية الكوكب كبيرة جداً لدرجة إن الثلج لما بيشتعل البخار بتاعه مش بيعرف يروح في حتة غير إنه يفضل جمب الثلج، و بالتالي بيفضل الثلج مشتعل بس مش بيسيح.
![]() |
كوكب gliese 436 - b |
كوكب cancri e ٥٥
حجمه ضعف حجم كوكب الأرض وبيبعد عنها بـ 40 سنة ضوئية، الكوكب ده هو قطعة من الألماس، و تكوينه ده جه من إنه أثناء تكونه في البداية كان معظمه من الكربون، و بسبب الضغط والحرارة العالية جداً اللي بيسببها النجم اللي بيدور حواليه الكوكب، تحول الكوكب ده لماسة كبيرة لأن ثلت الكوكب عبارة عن ألماس ولما تم تسعير الألماس اللي على الكوكب قدروا سعره بـ 26.9 نونيليون دولار والنونيلون عبارة عن الرقم 1 وقدامه 30 صفر.
![]() |
كوكب cancri e ٥٥ |
وممكن تفكر إنه يا سلام لو نقدر نطلع نجيب شوية ألماس كده من دول يحلوا عيشتنا في عز ما الدولار بينط ، هقولك إنه ده قدر ومكتوب مش هنعرف نهرب منه لأنك حتى بعد ما تجمع كمية كبيرة من الألماس وتنزل بيها كوكب الأرض فساعتها الألماس مش هيبقى له سعر و هيبقى رخيص جداً لأن سوق الألماس هيقع، هو ده القدر.
كوكب corot - 7b
هو كوكب بيدور حواليه نجم بعيد عن الأرض بـ 480 سنة ضوئية مش مختلف عن كوكب الأرض غير إنه عبارة عن جحيم مشتعل في الفضاء؛ لأن الكوكب بيمطر حجارة و براكين طول الوقت؛ لأن في جمب من الكوكب متجه للنجم بتاعه على طول و ده حرارته 2000 درجة مئوية والجمب التاني بعيد عن النجم علي طول فمفيش عليه أي نور ولا حرارة، و درجة حرارته 220 درجة مئوية بس تحت الصفر.
![]() |
كوكب corot - 7b |
كواكب بتمطر زجاج "كوكب HD 189733 b"
هو عبارة عن كوكب بيمطر إزاز طول الوقت وفي كل مكان علي الكوكب، و الإزاز ده اتكون بسبب إن الكوكب مليان بجزئيات سيليكون اتضغطت واتحولت لكتل من الإزاز و المشكلة كمان إن الإزاز ده بيطير في كل مكان بسبب سرعة الرياح الشديدة جداً اللي بتوصل ل 6400 كيلو متر في الساعة.
![]() |
كوكب HD 189733 b |
كوكب kepler - 438b
بعيد عن الأرض بـ 470 سنة ضوئية والكوكب ده قريب جداً في الشبه من كوكب الأرض شبهه بنسبة 88٪ العلماء اكتشفوه في يناير سنة 2015.
![]() |
كوكب kepler - 438b |
اقرأ ايضا: السر وراء منديل أم كلثوم التي كانت تمسكه في يديها