![]() |
صور الحداد |
كتبت آية أبو النجا
لما بتلاقي إتنين مابينهم مشاكل، أو حد حصل بينه وبين شخص معين خناقة كبيرة وتيجي تقوله تعالى نروح عند كذا فيقولك ده " بيني وبينه مصانع الحداد"، مبدئيًا كده كلنا بننطق المثل غلط لأنها مش "بيني وبينك مصانع الحداد" والنطق الصحيح هو "بيني وبينك ماصنع الحداد".
وحكاية المثل دا أبطالها هما زوج وزوجة كان مابينهم مشاكل والست كانت نكدية وبتعشق الخناق عشق، ودايمًا بتدخل الراجل في مشاكل وبتعمل من الولا حاجة حوار كبير والراجل فضل مستحمل بس كل إنسان وليه طاقة برضو.. فالراجل جه في يوم وجاب آخره واتخنق من كتر الزن وقالها " بيني وبينك ماصنع الحداد" وراح لشغله.
والست فضل شاغل تفكيرها هو إيه ده اللي الحداد صنعه وجوزها هينتقم منها بيه !، يا ترى إيه حديدة وهيخبطني بيها ويقتلني؟، وفضل عقلها رافض يبطل تفكير لحد ما جوزها رجع ومعاه شنطة وطلع منها حديدة طويلة وقرص حديد مدور مصنوع من الحديد، والست أول ماشافت ده قامت جرى تستخبى وافتكرت إنه ناوي على شر.
وبعد شوية سمعته بينده على إبنهم وبيقوله امسك الحديد ده واقف في نص الخيمة بالظبط واقعد خبط بيهم وبعد ما قاله كده سابه وخرج بره الخيمة، وفضل ماشي لحد مابعد بعيد وإبنه لسه بيخبط على الحديد والراجل كل ما كان يسمع صوت الخبط كل ماكان يبعد أكتر لحد نقطة وصوله لمنطقة إن معتش سامع صوت الخبط.
وهنا الراجل وقف مكانة وقام عامل خيمة وقاعد فيها وقال إن هيكمل اللي باقي من حياته هنا، وده كان الحل عشان يخلص من مراته الزنانة ويبعد عن زنها.
وحكاية الزوجين دول بقا خرجتلنا المثل الشعبي المعروف والأكثر شهرة " بيني وبينك ماصنع الحداد" ؛ وده معناه المسافة اللي بعدها الراجل عن مراته ومعتش سامع صوتها واستخدم في تحديد المسافة دي الحديد اللي صنعه الحداد.
اقرأ أيضا : أين اختفت دكتور مايا صبحي ، هل مازالت حية أم تم اغتيالها ؟!