كتبت: إيمان توفيق
مين فينا مابيحبش يتكلم، أغلبنا بيحب يتكلم ويعبر عن نفسه ويبقي واخد اللقطة، أغلبنا بيحب يتشاف ويشد الانتباه، ويضحك الناس بس ياترى هل دايما الكلام بيكون حلو؟
لا طبعا الكلام مش دايما حلو ولا صح، أحيانا بيكون الصمت أفضل بكتير، و زي ما إحنا عارفين إن لو الكلام فضة فالسكوت دهب واللي بيكتر كلامه، بتكتر غلطاته في الكلام، لو فيه قاعدة الناس بتتكلم فيها عن الاقتصاد مثلاً وأنت مابتفهمش في الاقتصاد ولا بتحبه اسكت، بلاش تفتي لو مش فاهم؛ لأنك لو اتكلمت وأنت معندكش المعلومات الكافية للي هتقوله، هيقولوا ياريته فضل ساكت أحسن ده ماضافش أي حاجة.
لو فيه ناس حواليك بتتكلم على حد اسكت، ماتدخلش معاهم في الكلام على الناس، وأعرف إن كل اللي هتقوله هيتردلك يا هيترد في حبايبك ومهما يجروك للكلام أهرب ولو تقدر تقولهم بلاش نتكلم على حد يبقى كتر ألف خيرك لأنك مجرد ماتتكلم على حد قدامهم هيتوقعوا إنك بتتكلم عليهم مع غيرهم تلقائيًا، الغيبة دايما فاكهة الحديث بس أثرها سلبي على النفس جداً فتجنبها.
الصمت
الصمت حكمة ماتتكلمش وأنت متضايق، اسكت شوية، إهدأ وفكر في كلامك عشان ماتقولش حاجة تندم عليها بس وأنت ساكت ماتفكرش كتير في ضيقتك عشان هتضايق أكتر، اشغل بالك بإنك إزاي تهدي نفسك وبعد كده أبقى حل المشكلة بهدوء.
ماتتكلمش إلا لو كان الكلام اللي هتقوله مفيد، مش هيجرح اللي قدامك، إيجابي، بيضيف للي قدامك حاجة محدش غيرك في القعده قالها،ماتقاطعش حد، لو حد بيحكيلك حاجة اسكت لحد ما يخلص كلامه، واكتفي بتعبيرات وشك اللي بتتفاعل معاه أثناء الكلام بيها وهز رأسك عشان تشجعه يكمل وبعد مايخلص خالص رد عليه ولو حابب ساعتها تتكلم اتكلم، ماتسابقش حد في الكلام وتأخذ منه المايك، لو حد بيحكيلك حاجة ماتقولوش آه ده أنا كمان حصل معايا كذا وكذا وتبدأ أنت اللي تحكي عن نفسك تطول ده مفيهوش أي نوع من أنواع الاحترام.
فيه حكمة بتقول ماندمت على الصمت مرة ولكنني ندمت على الكلام مراراً ودي جملة حقيقية؛ لأن الندم على الكلام بيكون أكتر من الندم على الصمت؛ لأن الكلمة مجرد مابتطلع منك بتتحاسب عليها، ممكن تتحرف ويتعمل عليها حوارات، يُساء فهمها، ويتعملها مونتاج كمان، فكر في الكلام لثواني قبل ماتقوله عشان ماتندمش.