كتبت: إيمان توفيق
الحياة المنفتحة على بعضها، خلت الناس تستغل بعض، وتتعدى على حدود بعض وكل ما يزيد العشم بيزيد الزعل، فلو كنت مش قادر تنفذ طلب لحد وقولتله إنك مش قادر، هيزعل وهيفتكر إنك بتتكبر عليه عشان أنت عارف تعمل الشيء ده وهو لا، ولو حد سألك سؤال شخصي وماحبيتش ترد عليه، هيزعل وهياخدها بشكل شخصي، وهيفتكر إن أنت مش حابب تقوله هو بالذات.
الخوف من قول كلمة لأ بيكون نابع من خوف الشخص إنه لو قال الكلمة دي هيتصنف كشخص قليل الذوق وغير مقبول، بس الحقيقة إنك لو بتخاف تقول لا فأنت هتندم جدًا على نتيجة ده بعدين؛ لأن فيه مواقف في الحياة لازم تقول فيها لا وبصوت عالي.
على سبيل المثال لما حد يحاول يهينك ويتنمر عليك، لازم تقف وتقول لأ أنا مش هسمح بده وماتكلمنيش بأسلوب وحش، وفهم الشخص ده إنه لو عمل كده مرة تانية هيكون ليك معاه تصرف تاني، لو حد حاول يكلفك بشغل بعد ساعات العمل الأساسية بتاعتك لازم ماتخافش تقول لا أنا عملت الحاجات اللي متكلف بيها النهارده في شغلي ولو قررت تعمله يبقى لازم تكون راضي ومختار إنك تعمله بأريحية، لو حد حاول يخليك تعمل أنت الشغل بتاعه وهو مايتعبش في حاجة قوله لا مش هينفع لازم أنت اللي تعمل شغلك بنفسك، وهكذا.
ده كله بقا مش معناه إنك لازم تقول لأ بقلة ذوق؛ لأنك ممكن تقول كلمة لأ بس من غير ماتقول لأ طب ازاي؟
- ممكن لما حد يطلب منك حاجة مش هتقدر تعملها ممكن تقوله آسف كان نفسي أساعدك ولو تعرف حد تاني ممكن يساعده في الحاجة دي قوله عليه.
- لو حد طلب منك تاكل أكلة مابتبحهاش ممكن تقوله شكرًا مش جعان.
- لو حد اعترفلك إنه بيحبك لكن أنت ماكنتش بتحبه ماتجرحش مشاعره بكلمة لا، ممكن تقوله إن أنت مش جاهز للارتباط حاليًا، وغيرها من المواقف الكتيرة.
طب لو بعد ده كله زعلوا؟ خلاص براحتهم خليهم يزعلوا ولازم تعرف إن كل ما هتخاف تقول لا كل ما الناس هتيجي عليك، وهتطلب أكتر من حقها وبعد شوية هتاخد حقوق مكتسبة هتبقى في نظرهم غدار وأناني، لو قررت ماعدتش تعمل الحاجة دي كلمة لا كمان كلمة كاشفة، بتكشف حقايق الناس؛ لأن وقت ماتقولها هتعرف بجد مين بيحبك وبيقدرك وبيحترم حدودك ومين اللي بيستغلك.
كلمة لأ إما إنك هتقولها وتختار راحتك، أو ماتقولهاش وساعتها هيجوا عليك ويحملوك فوق طاقتك وأنت اللي بتختار، وأنت بس اللي تقدر تحافظ على حدودك، فمتخافش تقول لا لأي حاجة مش عجباك، وطبعًا لازم نقول إن العطاء مهم، لكن الأهم إنك لما تدي، تدي وأنت راضي ومبسوط.
في النهاية فكل الكلام ده عن الناس المتطفلة، الاستغلالية، لكن طبعًا فيه ناس في حياتنا بيكونوا قريبين مننا أوي وبيدونا حاجات كتير ودول طبعًا احنا ساعات بنيجي على نفسنا وبنعمل حاجة عشان خاطرهم حتى لو مش عايزين نعملها، بس الفكرة إننا بنعمل ده ساعتها واحنا مبسوطين وراضيين، فلكل قاعدة استثناءات.