كتبت: إيمان توفيق
وحيد ولكن :
أغلب الناس بتخاف من الوحدة، مش بيحبوا يتخيلوا إن ممكن في يوم يضطروا يتعاملوا مع حزنهم لوحدهم، أو إنهم ممكن يعيشوا في يوم من غير صاحب مثلًا، حبيب، أو حتى أهل.
احنا كبشر كائنات اجتماعية بالفطرة، وده الطبيعي، بنحب الناس، بنحب نتكلم ونعبر عن نفسنا ومشاعرنا من بداية طفولتنا، وأثناء ما احنا بنتكلم وبنتعامل مع الناس، بنكتشف مع الوقت إن فيه شخص بيستغل مشاعرنا، والتاني بيستغل طيبتنا، و ده بياخد أسرارنا وينقلها، وده بيحقد علينا.
بنبدأ نمر بصدمات صغيرة شوية بشوية بتتراكم فوق بعضها، و لما نكبر شوية ونعدي فترة الطفولة ونوصل لمرحلة المراهقة بنكون ساعتها فقدنا جزء كبير من براءتنا؛ لأننا بنشوف الحياة ساعتها بشكل مختلف عشان بنمر بتجارب ومواقف مختلفة، بنبدأ ناخد حذرنا من الناس ومانعملش صداقات بسهولة، بنبدأ نعرف الخوف والحذر.
ومع مرور السنين، ولما بتكتر الصدمات بنكتشف إنه من الأفضل نبقى لوحدنا، وبنتقبل فكرة إنه عادي، الوحدة مش شبح وبنبدأ ناخدها كصديقة ونقول مع إن الوحدة هي آه مش جنة بس هي أرحم بكتير من نار الناس اللي عاملين نفسهم قريبين وهم مش قريبين وبيمثلوا علينا إنهم بيحبونا.
الوحدة مش وحشه :
على فكرة الوحدة مش معناها بس إنك مفيش معاك حد، لأ، أنت ممكن يكون حواليك ناس كتير أوي، و بردو حاسس إنك لوحدك مش عارف تتكلم مع حد، ولا حاسس إن في حد هيقدر يفهمك، ممكن تكون قاعد وسط ناس كتير بس مش سامعهم؛ لأنك في عالم تاني، عالم بتاعك أنت لوحدك بس، عالم جوا عقلك.
ورغم كده الوحدة مش زي ما أنت بتحكم عليها خالص، الوحدة مش شيء وحش، بالعكس خالص احنا بس اللي بنستغل أوقات وحدتنا غلط، الوحدة بتدينا فرصة نقعد مع نفسنا، نسمع أفكارنا، نحكم على مشاعرنا، وبتساعدنا نفكر في اللي حصل ونتعلم منه.
احنا بنفسنا ممكن نخلي الوحدة وحشه، بإننا نقعد نفكر كتير، ونكتئب و نسأل نفسنا، هو ليه محدش جمبنا؟ وليه محدش حاسس بينا؟وممكن بردو نخليها حلوة بإننا نستغلها صح، نعمل الحاجات اللي بنحبها مع نفسنا، نعرف إزاي نكون مستمتعين مع نفسنا ونديها حب زي مابندي للناس التانية.
أوقات كتير احنا اللي بنختار الوحدة عشان نفصل من الدنيا والناس، وبنحتاج للعزلة دي كل فترة؛ لأننا بنحس ساعتها إننا بنشحن طاقتنا عشان نقدر نرجع نتعامل في الحياة تاني.
ماتخافش من الوحده أبدًا دي صديق واحد لكنه أحسن من ألف صديق.