كتبت : إيمان توفيق
التفكير المفرط مرض العصر بعد ما تخلص يومك وبالذات أول مابتنام على سريرك بتبدأ تبص في السقف والأفكار تبتدي تيجي واحدة واحدة في دماغك لحد ما تحس إنها بتفترسك بتحس إن دماغك هتنفجر من كتر التفكير اللي مش عارف تسيطر عليه والمشكلة إن الأفكار دي كلها بتبقى سلبية بتغرق فيها وتدخل في دوامة من جلد الذات على اللي حصل وتفكير مفرط وقلق وخوف من اللي بيحصل واللي لسه هيحصل من غير ماتوصل لنهاية للأفكار دي وتحلها …
بتبقى عارف إن المستقبل بإيد ربنا وماينفعش تقلق منه لكن مابتقدرش لأن الأفكار بتبقى أقوى بكتير من قدرتك على السيطرة عليها والنوم بيهرب منك وتمسك دماغك وتقولها بالله عليكي اسكتي شوية كفاية بتحس إن فيه تقل على قلبك و إجهاد كبير أوي على عقلك وبتنام من كتر التعب بس بيبقى نومك قلق وبتصحى متضايق وحاسس إنك كنت بتجري وطاقتك مستهلكة.
الحل :
1- شد الفيشة، ماتسيبش الأفكار دي تاخدك إلى مالا نهاية حاول ترد على الأفكار دي بكل حاجة إيجابية عكسها وتفهم الحكمة منها قول لنفسك ده لو مكانش حصل مكنتش فهمت اللي فهمته دلوقتي ماكنتش نضجت بالشكل اللي بقيت عليه ده و اللي حصل ده هيفيدني وهيخليني أعرف أخد قرار أحسن في المستقبل وربنا هيساعدني قول كده لحد ما الأفكار تهدا.
2- وقف جلد الذات، ماتحاسبش نفسك علي حاجة عملتها زمان بخبرتك ونضجك وقتها لأنك دلوقتي خبرتك زادت واللي هتعمله النهارده بخبرة النهاردة غير اللي هتعمله بعد سنة بخبرتك ساعتها …وخليك فاكر دايما إن كل اللي بيحصل مكتوب من قبل ما نتخلق ومقدر لينا وربنا مدبره بعلمه وحكمته بالشكل اللي يناسب كل واحد فينا.
3- اذكر الله ليطمئن قلبك، كتر من الذكر كل ما تجيلك الأفكار دي وخصوصاً ذكر لا حول ولا قوة إلا بالله وخلي القرآن صاحبك ربنا هيطمن قلبك بالقرب منه.