كتبت: إيمان توفيق
التنمر والكلام السلبي:
من أكتر الحاجات اللي منتشرة في مجتمعنا هي التنمر والكلام السلبي ودول موجودين من زمان أوي من واحنا أطفال بس مكانش عندنا وعي بيهم.
فيه ناس إنها تتريق على غيرها، أو تقوله كلام سلبي، فيه ناس قمة سعادتها في إنها تقول لواحد إيه ده أنت بتتكلم كده ليه، ذوقك وحش، مناخيرك كبيرة، ضحكتك وحشة، لبسك وحش، أسنانك مش مظبوطة، و هو ده التنمر، أو تقوله أنت فاشل، أنت غبي، أنت مابتعرفش تعمل حاجة، شوف ابن خالتك عمل إيه وأنت قاعد، شوفي كل صحابك اتجوزوا وأنتِ قاعدة، وغيره من الكلام المؤذي اللي احنا عارفينه اللي بيتقال للشخص لحد ما يكره نفسه و حياته.
تنمري عليك طازة :
تأثير التنمر :
ماتتخيلش التنمر والكلام السلبي ممكن يعملوا إيه في الشخص، فيه حد من كتر ما وصله إنه شكله وحش مابقاش حابب ينزل من بيته وبقا مصدق إن شكله وحش، و شخص تاني من كتر ما قالوله أنت ضحكتك وحشة بقي بيخاف يضحك، وبقى أغلب الوقت مكشر، فيه حد من كتر ما قالوله أنت مناخيرك كبيرة، بقي بيصحي كل يوم يبص في المراية مش شايف حاجة حلوة فيه خالص، مابقاش شايف غير إن مناخيره كبيرة، و بيمشي في الشارع حاسس إن هو عبارة عن مناخير ماشية على الأرض.
كمان الكلام السلبي اللي قولت عليه اللي من نوعية أنت مابتفهمش ومابتعرفش ده، ده كلام كفيل إنه يكسر البني آدم ويحسسه إنه مش كفاية و إنه مش نافع ولا مرغوب فيه، بيحسسه بالعجز وقلة الحيلة لدرجة إنه ممكن يجيله اكتئاب ويقرر ينهي حياته.
التنمر والتربية :
التنمر والكلام السلبي ده بيبدأ بين الأطفال وهم مش فاهمين، وهنا بيجي دور الأهل إنهم لما يشوفوا ولادهم بيتنمروا يفهموهم مرة واتنين ومليون إن ده غلط و إنهم كده بيأذوا الناس؛ لأنهم لما بيطنشوا ده، الأطفال دول لما بيكبروا بيتحولوا للناس المؤذية اللي بنشوفها اللي كلامها زي الرصاص، بيقتل كل اللي حواليهم.
والكارثة الأكبر بقا لو كان الأهل نفسهم هم اللي متنمرين كده، الله يرحم نفسية الشخص ده بقا و يقدره على العقد اللي هتبقى عنده واللي هتطلعه إما مريض نفسي أو ربنا هيكتبله إنه يدرك إنها مشكلة بس هيتعب أوي عشان يقدر يعالجها.
طريقة التعامل مع التنمر :
هل أنت بتتعرض للتنمر ولا أنت شخص متنمر؟
- لو أنت شخص بتتعرض للتنمر أو الكلام السلبي فلازم تعرف إن فيه ناس كتير طبعها مؤذي مش أنت اللي وحش، مش أنت اللي فيك حاجة غلط فيه ناس بتحب تكسر اللي قدامها، مش أنت اللي فاشل، و منبوذ عشان لسه ما اشتغلتش أو مانجحتش زي ابن خالتك أو أنتِ ما اتجوزتيش زي بنت عمة خال جدتك، فكر نفسك دايمًا إن الناس دول هم اللي مؤذيين و ماتديش أي اهتمام لكلامهم خالص أنت فيك حاجات كتير حلوة ممكن تكون طيب، جدع، حنين، بتساعد الناس، مبدع، فنان، أخلاقك عالية، ذوق، وحاجات تانية كتير شوف نقط قوتك فين و قدرها وطورها ومش مهم خالص نظرة الناس طالما أنت مابتعملش حاجة غلط أو حرام.
- لازم ترد على كل واحد بيتنمر وتوقفه عند حده وتقوله إنك مابتحبش الأسلوب ده وإن المره الجاية هيكون ليك تصرف تاني ماتخافش إنك تاخد حقك.
أما لو أنت بقا لا قدر الله شخص متنمر وربنا قدرلك تشوف الكلام ده، يمكن يفرق في حياتك فأتمنى إنك تراجع نفسك وتفكر لثواني بس في الكلام اللي هتقوله لغيرك واسأل نفسك قبل ماتقول أي كلمة لحد تاني، هل الكلام اللي هتقوله ده هيضايقه أو يجرحه؟ هل الكلام ده سلبي هيكسره؟ وأهم سؤال تسأله لنفسك هل الكلام ده ترضاه أنت على نفسك؟ ترضى إن حد يقولهولك؟ والإجابة أكيد هتحدد هل هتقول الكلام ده ولا تحتفط بيه لنفسك.
لو أنت بقا شخص بتتنمر على ولادك أو طول الوقت بتقولهم كلام سلبي وتقارنهم بغيرهم فياريت تتقي الله؛ لأنك بتعمل جريمة في حقهم وبتجيبلهم أمراض نفسية مش هيدركوا إن أنت السبب فيها غير لما يكبروا وساعتها مش هيسامحوك.
ومش بس كده، لو كانت نتيجة تنمرك عليهم إنهم لما كبروا اتحولوا لأشخاص متنمرين كتعويض لاحساس النقص اللي اتخلق جواهم فكده مبروك عليك ذنبهم وذنب الناس اللي اتنمروا عليهم فراجع نفسك قبل فوات الأوان.