كتبت: إيمان توفيق
الخوف هو عدونا الأبدي:
الخوف من أكبر الأعداء في حياتنا، الخوف بيعطلنا عن أي حاجة مفيدة، أو جديدة ممكن نعملها.
بتقرر إنك ما تصاحبش تاني عشان خايف إنه يطلع ندل زي اللي عرفتهم قبل كده، بتخاف ترتبط تاني عشان خايف إنه يطلع مؤذي زي اللي ارتبطت بيه قبل كده، بتخاف تشتغل عشان خايف تتعب، وماتعرفش تتأقلم، وبتخاف تغير شغلك رغم إنه متعب جدًا ليك ومفيش أي تقدير فيه عشان خايف إنك ما تعرفش تتعامل في الشغل الجديد، أو إن يكون الشغل الجديد ده متعب ليك نفسيًا أكتر، وبتمشي ورا المثل المؤذي اللي اتكلمت عنه قبل كده اللي هو اللي نعرفه أحسن من اللي مانعرفوش.
أغلبنا بنحب نفضل في منطقة الراحة، اللي هي أصلًا ممكن ماتكونش منطقة راحة ولا حاجة لأنك أنت أصلًا مش مرتاح بس خايف، وعشان كده لازم نعرف إن جوانا صوتين:
الصوت الأول بيقولك قوم إتحرك، اعمل حاجة، ارفض الوضع المؤذي ده واخرج منه، اتعرف على صاحب تاني عادي يمكن يطلع كويس ويعوضك عن اللي فات.
والصوت التاني بيقولك لا ماتعملش، لا خليها بكره، لا ماتسيبش الشخص المؤذي ده عشان هتتعب أنت خلاص عرفته لسه هتجازف وتتعرف على حد جديد، لا ماتصاحبش تاني، لا ماتحبش تاني، والصوت ده هو سبب الخوف اللي بنبقي فيه.
هشبه الصوتين دول بملاك و شيطان واللي هتغذيه فيهم هو اللي هيكبر، طب إحنا بنغذيهم إزاي؟
كل ماتسمع كلام صوت فيهم كل ماهتغذي الصوت ده وتخليه ينتصر على الصوت التاني، يعني كل ماتسمع الصوت الحلو اللي عايزك تبقي أحسن و بيقولك قوم إتحرك اعمل حاجة، ساعد حد، أو أيًا كان الكلام الإيجابي اللي بيشجعك تعمله وتنفذه، كل ما الصوت ده هيتغذى ويكبر.
وكل ما تسمع كلام الصوت المؤذي اللي بيقولك لا خليك قاعد هنا خليك في المكان ده، خليك في العلاقة المؤذية دي أو أياً كان الكلام السلبي اللي بيشجعك عليه وتنفذه كل ما الصوت المؤذي ده هو اللي هيكبر ويتغذى.
حلول للتغلب على الخوف:
- أكيد أنت بتتمنى الصوت الحلو هو اللي يفضل معاك ركز معاه وشوف بيقولك إيه وامشي وراه لأنه هيفرق جدًا في حياتك بعد كده.
- ركز كويس أوي في افكارك لأن الافكار بتسبب المشاعر، والمشاعر بتسبب السلوك فبالتالي لو عايز تغير المشاعر والسلوك لازم تتحكم في الافكار وتغيرها.
- ماتخافش من المخاطرة بس اعمل شوية احتياطات قبل ماتاخدها يعني نفترض أنت عايز تصاحب حد بس خايف يطلع ندل، أو مش واثق في مدى أمانته إنه يكون صديق جرب تحكيله سر بسيط عنك، و أكدله إن ده سر ولو اكتشفت إنه قال السر ده رغم إنك مأكد عليه، يبقى ده كده ماينفعش يكون صديق لكن لو لقيته أمين حاول تعرفه أسرار أكتر عنك بس بردو ماتكونش أسرار كبيرة لو اتعرفت تسببلك مشكلة لحد ماتثق تمام الثقة إنه ينفع صديق حقيقي ليك.
لو أنت خايف ترتبط تاني شوف إيه اللي حصل في علاقتك الأولى وليه حصل و اتعلم منه وتجنب الحاجات السيئة اللي حصلت دي في علاقتك التانية واصبر شوية ماتدخلش العلاقة الجديدة بكل مشاعرك من الأول واتقل، وهكذا حاول تطبق ده على كل حاجة في حياتك و هتلاقي الخوف بيقل بإذن الله.