كتبت أيه أبو النجا
من الظواهر الغريبة اللي حصلت " ظاهرة انتحار الحيتان " وهي إن في عدد كبير جدًا من الحيتان انتحر في عام 2020، وإتقال إن العدد دا وصل لـ 460 حوت انتحر على شواطئ جزيرة تسمانيا الأسترالية.
والسؤال اللي بيطرح نفسه بقى ليه واحد من أذكى كائنات الأرض ينتحر بالطريقه دي؟ والأغرب إن هما بينتحروا مجموعات وده سبب غموض كبير جدًا؛ وإتقال تفسيرات كتير من العلماء عن السبب في قيام الحيتان بالانتحار.
تفسيرات انتحار الحيتان
في تفسير بيقول إن بعض الحيتان بتنتحر بسبب ظواهر البيئة وتغيرات المناخ زي ذوبان الجبال ده بيخلي الحيتان ما تقدرش تميز ما بين الإتجاهات وده بيخليهم يتجهوا إلى مناطق مش معروفة لحد ما تتجه إلى الشاطئ من غير ما تحس.
وفي تفسير تاني بيقول إن سبب انتحارهم هو إن الحيتان دي ممكن تكون مريضة أو بسبب التحول الجيني أو التأثر بالسموم الكيميائية الموجودة في البحر وتلوث المياه وانتشار ظاهرة الطحالب اللي تعرف بظاهرة "المد الأحمر"، وكل دا بيضعف الحوت وبالتالي ما بيقدرش يقاوم التيارات البحريه اللي بتدفعه لإتجاه الشاطئ لانه بيكون مش قادر يعوم.
أما بقى التفسير اللي اتفق عليه الباحثين إن السفن اللي بتستخدم السونار وأجهزة التصوير الصوتي ده بيخلق صدى تحت المياه فبتعمل للحيتان حالة من الارتباك والتوتر والخوف وبيفقدها حس المكان، وبتكون عاوزة تهرب من الصوت ده بأي شكل فبتفضل تبعد عنه لحد ما بتوصل للشاطئ وبتموت.
عدد حالات انتحار الحيتان
في الفتره الأخيره الباحثين اكتشفوا إن عدد الحيتان قل من 5 مليون إلى 1.3 مليون، وده كان بسبب الصيد أو حالات الانتحار اللي انتشرت فجأة، والموضوع دا مش أول مرة يحصل لأن في عام 1918 انتحر 1000 حوت في نيوزيلندا وتم تسجيله كأكبر عدد انتحار للحيتان لحد دلوقتي، ده غير كمان إن في 2017 حصل تاني أكبر حدث انتحار للحيتان، لما الباحثين اكتشفوا أكتر من 650 حوت على الشاطئ.
وكان اللي بيحصل ساعتها إن السلطات المحلية بتقوم بغلق كل الشواطئ اللي انتحرت فيها الحيتان، ودا بسبب إن الشاطئ بقى مكان خطر على البشر لأنه بيبقى مكان جذب لأسماك القرش بأعداد كبيرة جدًا.
أهمية الحيتان وهيحصل إيه لو انقرضت؟
تخيل إن الحيتان بتساهم في دور كبير جدًا في حماية البيئة أكتر من الأشجار! وده لأنها بتمتص غاز ثاني أكسيد الكربون بحوالي 33 طن في خلال 200 سنة، لكن الأشجار بتمتص 2 ونص طن من ثاني الأكسيد في نفس المدة اللي هي الـ 200 سنة.
وصندوق النقد الدولي والأمم المتحدة لحماية البيئة كثفوا النشر في الحملات اللي بتناشد البشر بضرورة حماية الشواطئ والبيئة للمحافظة على الحيتان من الانقراض، ودة لأن أي مكان بيكون موجود فيه حيتان بتكتر العوالق النباتية بسبب إنها بتتغذى على فضلات الحيتان، والعوالق النباتية الموجودة على الأرض بتحبس حوالي 37 مليار طن من ثاني الأكسيد ، يعني قد مساحه 4 غابات من غابات الأمازون فتقدر تقول كده إن الحيتان بتساهم بـ 50% من الأكسجين اللي موجود في الجو.. تخيل بقى لو إنقرضت هيحصل إيه!
أشهر الحيتان
الحيتان بتعتبر من أكتر الحيوانات الغامضة على الأرض وكمان من أذكى الكائنات الحية، وموجود أكتر من 78 نوع حوت في العالم وأشهر الحيتان هو " الحوت الازرق" وده لأنه الحيوان الأضخم في العالم، ويصل طوله لأكتر من 30 متر، ووزنه 170 ألف كيلو جرام.
وحجم قلب الحوت قد العربية الصغيرة وتقدر تسمع صوت دقات قلب الحوت على بعد 3000 متر، وبسبب حجم بوقه يقدر يبلع 100 شخص في المرة الواحدة.
والحيتان بتتميز بالذكاء عن غيرها من الكائنات على الأرض لأن دماغ الحوت من أكتر الأدمغة المعقدة في عالم الحيوان، واتعمل نظرية حديثة للتشريح العصبي لدماغ الإنسان والحوت وتم اكتشاف إن قشرة الدماغ عند الحوت موجود فيها تلافيف أكتر من اللي موجودة عند الإنسان.
أما بالنسبة لحجم دماغ "حوت العنبر" بيوصل لست أضعاف حجم دماغ الإنسان، و حيتان العنبر بتتميز بصوتها العالي جدًا من بين كل الحيوانات وتصدر أصوات بشكل عالي ومتقطع، فالعلماء قاموا بتسجيل كل الأصوات دي واكتشفوا أنها بتحتوي على مفردات معقدة وإن ليهم لغة للتواصل بينهم وبين بعض.
وده خلى العلماء عملوا مشروع يعرف بـ " CET" أو "مبادرة الترجمة الحيتانية " ، وقاموا بتجميع كل مفردات وشفرات حوت العنبر عن طريق استخدام آلة بتفك شفرة الصوت اللي بيستخدمه الحيتان في التواصل مع بعضهم.