كتبت : ايمان توفيق
إحنا مخلوقات اجتماعية بالفطرة بنحب يبقى لينا علاقات مع اللي حوالينا ومن أول ما بنتولد وإحنا بتربطنا علاقاتنا بالأهل والقرايب ولما نكبر شوية دواير علاقاتنا بتوسع وبنتعامل مع جيراننا ومرورًا بالمدرسة والجامعة بنتعرف على ناس كتير أحيانًا بنختار إن علاقاتنا ببعض الناس تبقى سطحية وأحيانًا بنختار إنها تبقى عميقة و قوية..العلاقات اللي بنعدي بيها دي كلها قد تكون علاقات صحية أو علاقات سامة وده موضوعنا.
العلاقات السامة اسمها كده لأن تأثيرها بيكون زي تأثير السم على جسمنا وصحتنا، أنت متخيل حجم الأذى اللي ممكن تسببهولك العلاقات دي ؟ والناس السامة دي بتبان في الأول مثالية وطيبة جدًا للأسف لحد ما نصطدم بالواقع المر، مع الوقت عشان كده لازم نعرف الناس دي مين فنقدر نتجنب الأذى اللي بيوصلنا منهم.
هنلاقي الناس دي كل همهم إنهم يحبطونا ويكسروا فينا ويحاولوا يعطلوا أي محاولة لينا عشان نكون أحسن؛ لأن عقد النقص اللي عندهم بتمنعهم يتقبلوا يشوفوا حد أحسن منهم، وقد يكون الشخص السام ده صديق أو أب أو أم أو أخت أو أخ أو شريك حياة و بيأذونا من غير مايكونوا مستوعبين إنهم بيأذونا.
كيفية معرفة العلاقة توكسيك وكيفية تجنبها ؟
مبدأيًا لازم نفهم إن العلاقة السامة هي أي علاقة بتكون فيها مش مرتاح أغلب الوقت ولا مبسوط وحاسس إنك مجهد، وهي أي علاقة بتسحب طاقتك وبترهقك وبتبدأ إنك تفقد شخصيتك وسلامك النفسي وراحة بالك هتحس فيها بالغضب والحزن والألم، أكتر ما هتحس بالسعادة والراحة ومع الوقت حياتك وشغلك ونفسيتك وعلاقاتك بالناس هتتأثر وتبقى أسوأ، وهتميل للانعزال وتبطل تحب تخرج وتشوف الناس ودايما هتحس بعدم الاحترام وإن احتياجاتك مش متشافة، طب إيه بقا العلامات اللي لو شوفتها في الناس اللي تعرفهم تفهم إنك في علاقة سامة.؟
أنواع العلاقات السامة
العلامة الأولي من أنواع العلاقات السامة
النرجسية : ودي نوع من أنواع اضطرابات الشخصية وهي واحدة من أنواع العلاقات السانة ، ومنتشر دلوقتي بطريقة كبيرة، وأصحاب الاضطراب ده عندهم احساس زايد جدًا بأهميتهم و عايزين الدنيا تلف حواليهم والناس تتشقلب عشان ترضيهم؛ لأنهم شايفين نفسهم محور الكون.
كمان عندهم حب للدراما و خلق المشاكل من أي حاجة تافهة، بيحوروا كلامك العادي ويحولوه لخناقات لدرجة إنك بتلاقي علاقتك بيهم بقت عبارة عن جدالات فارغة، وماتتوقعش إنك تكسب أي جدال مع النرجسي؛ لأنه مابيعترفش بأخطائه خالص وبيشوف إن أي حاجة غلط بتحصل، إنها حصلت بسببك أنت ولو قال آسف فبيقولها بس عشان يمشي الدنيا ويخلص الجدال مش عشان مقتنع إنه غلط، ومش هتحس أبدًا بندمه و هيلومك على كل حركة وفعل وكلمة مش عجباه وفي الغالب مفيش حاجة هترضيه، وهتحس إنك مش مقبول و مش كفاية.
النرجسي لو شريك حياة فبيبدأ علاقته بيك بمرحلة اسمها (love bombing)
يعني انفجار الحب، وفي المرحلة دي بتلاقي علاقتك بيه بتتطور بسرعه جدًا هتلاقيه بيهتم بيك اهتمام مبالغ فيه وبيسيطر على يومك وتفاصيلك ويشغل كل وقتك ويقضي على مساحتك الشخصية، ويعلقك بيه وبعد فتره يبدأ يقلل اهتمام ويديك جرعات محددة من الحنية والرومانسية كل فترة عشان يعلقك بيه، والسعادة والاهتمام المفرط ده بيخلي عقلك يفرز هرمونات السعادة بكميات كبيرة جدًا والهرمونات دي بتمر من نفس المراكز العصبية بتاعة الإدمان فبتدمنه وبيبقى صعب جدًا تتخلص منه وبتبقى محتاج للحظات السعادة اللي بيديهالك عشان الهرمونات دي فتعلقك بيه بيزيد أكتر.
النرجسي بيجرك للغلط وياسلام لو أنت شخص عاطفي وبتنفعل هيستغل ده ويضايقك، ويوصلك لفقدان أعصابك والخروج عن شعورك وبعدين يمسك عليك غلطاتك اللي هو السبب فيها ويعايرك بيها و يعملك حاجة اسمها "gaslighting"، يعني بيخليك تركز على الحاجة اللي عايزك تشوفها بس عن طريق تكرارها كل شوية و يعميك عن بقية الحاجات المهمة اللي ممكن لو أخدت بالك منها تمسكها عليه.
مش بس كده هو كمان بيشكك في اللي بيحصل وعنده قدرة رهيبة يقنعك إنك قولت حاجة ماقولتهاش، وإنك ماسمعتش الحاجة اللي أنت متأكد إنك سمعتها لحد ماتشك في نفسك و عقلك، وممكن توصل لمرحلة إنك تكتب كل حاجة بتحصل عشان ماتشكش في نفسك و تعرف تتكلم معاه لو حب يحور عليك، وهتكتشف ساعتها كدبه وقد إيه بيأذيك.
النرجسي كمان بيتهمك بكل العيوب اللي عنده هو، ويحسسك بالذنب وتأنيب الضمير، بيبقوا أذكياء جدا وبيعملوا ده ببراعة و يقلل من قيمتك بشكل مباشر أو غير مباشر بكلام مايتاخدش عليه يعني مش هيشتمك شتيمة صريحة.
الصراع مع النرجسي صراع صعب جدًا لدرجة إن اللي بيتخلص من علاقة مع نرجسي بيسمى ناجي كأنه كان بيحارب في معركة وكسبها.
العلامة الثانية من أنواع العلاقات السامة
الكدب : ودي العلامة 2 من علامات العلاقات السامة ، إنك تكون في علاقة مع شخص بيكدب في كل حاجة في حياته حتى في أبسط الأشياء بيألف قصص وحكايات، ويصدقها وهيبقى باين أوى ومع ذلك مكمل في كدبه، مع الوقت مش هتبقى عارف تفرق إيه بالظبط اللي صح في كلامه وإيه اللي غلط و طبعا مش هتقدر تثق فيه أبدا ولا تأمنه على سر.
العلامة الثالثة من أنواع العلاقات السامة
اللوم : هتلاقي الشخص بيحسسك طول الوقت إنك السبب في كل حاجة وحشه بتحصل في حياته، وفي حياتك و أنت السبب في حرب أوكرانيا وروسيا وأنت اللي ثقبت الأوزون، هتحس مع الوقت إن أنت السبب فعلا وهتشك في نفسك لأنه بيلومك على كل تصرف وحركة وبينتقدك في طريقة كلامك أو طريقة لبسك أو الأسلوب اللي بتعبر بيه عن غضبك، وده بيخليك طول الوقت حاسس إنك ماشي على قشر بيض وكل خطوة بتعملها بتكون عامل حسابها كويس، عشان ماتتعرضش للوم والانتقاد أو بتريح دماغك وتاخد رأيه في اي حاجة صغيرة أو كبيرة وتعمل بيه، عشان تتجنب كلمة ليه ماعملتش كذا بس ده مع الوقت بيحولك لشخص اعتمادي، وثقتك بنفسك بتبقى معدومة ومش هتعرف تاخد أي قرار في حياتك بعد كده.
العلامة الرابعة من أنواع العلاقات السامة
التشاؤم : ودي العلامة 4 من علامات العلاقات السامة ، هتلاقي الشخص ده دايما بيتوقع الأسوأ في كل حاجة هتلاقيه على سبيل المثال بيقولك إحنا أكيد هنسقط، أو أكيد مش هنتقبل في الشغلانة دي ما إحنا فقر أصلا هم يعني معقول هيسيبوا كل الناس دي ويقبلونا إحنا، أو أكيد يعني هنتجوز جوازة وحشة ما كل الناس بتعاني في جوازاتها، هي هتيجي على قرمط يعني وحاله ينصلح وحرفيًا الشخص ده مرهق جدا وهيملاك طاقة سلبية، وهتحس إن الدنيا مفيش منها أمل عشان ده عنده أمل ماتت من زمان، فالشخص ده قلل على قد ماتقدر الكلام معاه ودايما رد عليه وقوله صلي علي النبي تفائلوا بالخير تجدوه، وإن شاء الله خير مش هيقتنع مش مهم المهم حاول تقفل عليه الكلام، من قبل مايبدأ وحط في دماغك إن كل توقعاته السلبية مش حقيقة عشان تحمي نفسك من طاقته السلبية.
العلامات الخامسة من أنواع العلاقات السامة
الشك : هتلاقي الشخص ده حاسس طول الوقت إنك مش محل ثقة بلا مبرر، ولو ده شريك حياتك سواء راجل أو ست هتعاني معاه جدًا عشان هتلاقيه بيسألك كتير عن كل حاجة، بطريقة تبينلك إنه شاكك فيك زي.. إنت بتعمل إيه وبتكلم مين وليه مارديتش عليا أول ما رنيت، كنت فاتح دلوقتي بتعمل إيه وليه بصيت للشخص ده أنت ضحكت له كنت فين ومع مين و اديني باسورد الفيس ولا أقولك اديني باسوورد الموبايل كله، وأدور أنا براحتي وهيبرر كل ده باسم إنه خايف عليك ووارد تتفاجيء إنه بيفتش في موبايلك، وممكن الموضوع يتطور وتكتشف إنه حاططلك جهاز تتبع أو عامل اختراق لموبايلك عشان يتابع كل تحركاتك هتحس بعدم الأمان حتى وأنت في بيتك.
العلامة السادسة من أنواع العلاقات السامة
الشكوى الدائمة : ودي العلامة 6 من علامات العلاقات السامة ، ده الشخص اللي طول الوقت بيشتكي من حياته ومن الدنيا ومن العيشة، ومش هتكون مجرد فضفضة مرة وتعدي لا ده كل ماتشوفه هيقولك أنا الدنيا جاية عليا جامد، ويادنيا طفيتي شمعي ياناس كترتوا دمعي وخزان احزان، وده هيملاك طاقة سلبية وهتخلص قاعده معاه وأنت كاره حياتك وطاقتك مستهلكة؛ لأنك بتواسي طول الوقت وقعدتكوا مع بعض عبارة عن عياط ونكد بس.
العلامات السابعة من أنواع العلاقات السامة
عدم الاعتراف بالخطأ : الشخص السام مابيعترفش بأخطائه وحتى لو قال آسف فبيقولها عشان يريح دماغه وهيرجع يعمل نفس الحاجة دي تاني مش هيتحمل مسؤولية غلطاته، وهيدفعك أنت فاتورة كل شيء غلط بيحصل وهيرمي الغلط عليك ويوقعك أنت في المشاكل بداله.
العلامة الثامنة من أنواع العلاقات السامة
الصح دايما : ودي العلامة 8 من علامات العلاقات السامة ، الشخص السام هيشوف نفسه دايما صح وتفكيره ورأيه وقراراته صح وماينفعش تناقشه فيها، وحتى لو في الأول بينلك إنه بيتناقش هيسعى بعد كده إنه يثبت وجهة نظره، ولو حاولت تغلطه هيهاجمك وينتقد تفكيرك والنقاشات معاه هتبقى عبارة عن جدالات كأنك معاه في حرب بيسعي إنه يكسبها.
العلامات التاسعة من أنواع العلاقات السامة
الغرور والتكبر : ده شخص شايف نفسه جدًا وبيبين ثقة مزيفة بنفسه بيخفي بيها نفسيته الضعيفة، وعدم الأمان اللي حاسس بيه، بيشوف نفسه فاهم كل حاجة وشايف إنه مش محتاج يتعلم ولا يتطور في حاجة؛ لأنه نبغة ويعلمنا ويعلم أجيال.
العلامة العاشرة من أنواع العلاقات السامة
محور الكون : ودي العلامة 10 من علامات العلاقات السامة ، ده عايز كل الناس تهتم بيه وتاخد بالها من كلامه وتضحك على النكت اللي بيقولها حتى لو مابتضحكش، عايز يبقي محور أي قاعده ولو حد تاني خد منه اللقطة يتضايق ويحاول تاني إنه يجذب الاهتمام ليه، وعايز الناس تسمعه بدون اعتراض أو تعليق ويحترموا كلامه و متطلباته كتيرة ومرهقة ولازم أنت تبقى على أعلى مستوي، علشان أنت معاه وواجهة ليه و بيتعامل معاك على إنك شيء مش بني آدم.
السيطرة : ودي العلامة 11 من علامات العلاقات السامة ، الشخص ده هيسعى دايما إنه يسيطر على كل حاجة في حياتك، ويتحكم في كل حاجة تخصك وهيسعى إنه يعرف كل تفصيلة صغيرة أو كبيرة زي نومك، أكلك، شغلك، مرتبك أصحابك وعيلتك حتى لو أنت مش حابب ده، وأي قرار بتاخده حتى لو كان صغير لازم يبقى هو اللي متحكم فيه وموافق عليه، ولو عملت غير كده هيتخانق معاك ويتهمك إنك مش مديله قيمته، وبتتصرف من دماغك مع إن حقك كبني آدم تتصرف من دماغك عادي.
الكمال : ودي العلامة 12 من علامات العلاقات السامة ، الشخص ده بيبقي عايز كل حاجة تبقى مثالية يعني أنت لازم تبقى طول الوقت جميل ومبسوط وشيك، وتحتويه وتهتم بيه و تقيد له صوابعك العشرة شمع وتجيب عشرين صابع زيادة تقيدهم شمع بردو، مالكش حق إنك تضايق أو تتعب فتهمل شوية في نفسك أو تكتئب وتحزن؛ لأنك بني آدم لا أنت يا تبقى مثالي يا هيبعد عنك وبصراحة الشخص ده قوله الباب يفوت جمل؛ لأن مفيش بني آدم هيعرف يبقى مثالي أصلا.ولازم يكون عندك الشجاعة إنك تتخلص من أي علاقة مؤذية في حياتك، ولازم تحب نفسك وتعززها وماتقبلش بأقل من اللي تستحقه ولا تقبل إهانة ولا كدب ولا قلة قيمة تحت أي مسمى، لأن اللي بيأذيك عمره ماحبك واللي بيحبك هيكون كل همه يسعدك، فماتزعلش على خسارة الناس دي؛ لأنها هتبقى مكسب وخليك عارف إنك هتتعب أكيد وهتعدي بفترة صعبة بس كل ما كان البعد عنهم بدري كل ما كان أحسن، والعذاب في البعد عنهم أهون بكتير من العذاب اللي هتفضل تشوفه طول حياتك بوجودهم وحاوط نفسك بناس تدعمك وتقويك وتحبك لذاتك من غير أي مصلحه. وزي مافيه علاقات في حياتك ممكن تبقي توكسيك فممكن أنت كمان تكون شحص توكسيك وأنت مش واخد بالك، فلو فيه صفة من اللي قرأتها فيك حاول تصلحها في نفسك بالتدريب أو بمساعدة متخصص ومش عيب نحاسب نفسنا ونصلح الغلط فيها عشان مانبقاش مؤذيين للي حوالينا.
خلينا نتفق إن مفيش حد فينا معندوش عيوب، وقدرة كل شخص على تحمل العيوب دي بتختلف من شخص للتاني كمان عدد العيوب مقارنة بالمميزات بتفرق فممكن جدًا تكون بتعرف تتعامل مع الشخص المسيطر وتتحمله، لكن ماتعرفش تتحمل الشكاك والعكس بيحصل مع غيرك، وممكن تقبل تتعامل مع واحد متشائم شوية لأنه شاطر في حل أي مشكلة ممكن تقابلك، فأنت أكتر واحد عارف قدراتك وإيه اللي ممكن تتحمله وإيه لا بس الأكيد إنك لازم تحافظ على حدودك، وماتسمحش لحد يتدخل في خصوصياتك غير اللي تثق فيه وتسمحله بكده وكمان تتحكم في اللي يتقال واللي مايتقالش وده حقك.
و ما ننساش إن مش كل العلاقات سامة لا فيه علاقات صحية ودي العلاقات اللي بتخليك تطلع أحسن نسخة من نفسك، وبتطور منك ومن شخصيتك للأحسن هتاخد فيها مساحتك الخاصة من غير خنقة وتضييق وهتلاقي تشجيع لأهدافك ودعم نفسي في أوقاتك الصعبة هتلاقي فيها حب حقيقي وحد بيسمعك باهتمام، هتكون محبوب حتى في أسوأ حالاتك و هتحس إن قيمتك كبيرة ومتقدر وواخد احترامك، وهتحس إنك موثوق فيك وإن أوقاتك الحلوة وسعادتك أكتر بكتير من أوقاتك الوحشة والسلام النفسي وراحة البال هتبقي أكبر بكتير في حياتك، وطبعًا كل ده هيبقي متبادل بينك وبين الطرف التاني في العلاقة فربنا يجعل في حياتنا كلنا علاقات صحية و نلاقي الونس والدفى.
اقرأ أيضا : [سمكة أم تمساح]