كتبت أيه أبو النجا
زي ما معروف إن الإنسان قدر يكتشف أعماق البحار وكمان الفضاء ، بس مقدرش إنه يكتشف الغموض اللي بيدور حوالين بعض المناطق ويا سلام بقى لو غموض المنطقة معاه رعب كمان هيسيب علامات استفهام وعلامات تعجب زي مثلث برمودا كده ، بس مش هو ده المكان الوحيد الغامض المرعب اللي مفيش منه ، وفي منطقة مليانه بالغموض والرعب أكتر من برمودا ، والفرق ما بينهم إن برمودا في البحر إنما المنطقة دي في الصحراء وهي :
" منطقة حزام الصمت "
و دي منطقة بتقع في صحراء مابيمي في شمال المكسيك ، وقام البعض بدراسة إحداثيات المنطقة بالمقارنة ما بينها وما بين مثلث برمودا ويا محاسن الصدف تم إكتشاف إن منطقة حزام الصمت بتقع عند نفس دائرة عرض برمودا.
وبداية معرفة غموض المنطقة كان في 11 يوليو 1970 لما الجيش الأمريكي أطلق صاروخ "Athena RTV" للتجربة من قاعدة نيو مكسيكو ، وإتقال إن المفروض الصاروخ كان هيعدي من جنب منطقة حزام الصمت ولكن عند اقترابه من المنطقة إنحرف تلقائيًا وغير مساره وحصل فيه عطل ودخل المنطقة وانفجر فيها.
وحاول الجيش اكتشاف المنطقة واستعادة بقايا الصاروخ وسبب انفجاره ، ولما وافقت حكومة المكسيك على طلب الجيش قامت الولايات المتحدة بإرسال أول بعثة علمية مكونة من خبراء من وكالة ناسا.
ولكن الغريب إن الخبراء لما وصلوا منطقة حزام الصمت ماوصلوش لأي حاجة غير لألغاز ملهاش أي تفسير وغموض بيدور حوالين المنطقة ، وهو إن مفيش أي ترددات راديو فيها واختفائها من على كل الأجهزة ، وكمان منع أي إشارة تليفون في المنطقة ، ده غير إن مفيش قمر صناعي قدر يرصد المكان.
ده حتى البوصلة كمان مش بتشتغل فيها وإن اشتغلت بتتحرك بشكل عشوائي ، ده غير وجود كميات كبيرة من بقايا النيازك والشهب الفضائية محطمة في المنطقة ، وكمان اكتشفوا وجود جثث لحيوانات كتير جدًا ومفيش أي سبب واضح لموتهم.
ده حتى الطيور اللي معروف عنها إنها قادره على تحديد المواقع بدقه لما بتوصل المنطقة دي بتكون في حالة تشتت وتوهان وبيصيبهم هلوسة ؛ وفي تجربة عملها العلماء وهي إنهم حطوا سلحفة في المنطقة وفي خلال ثواني والسلحفة قلبت صدفتها ، وفضلت تبص للشمس وكان أصابها جنون غريب.
وسبب تسمية المنطقة بالاسم دة
مش عشان إنها مش عايش فيها حيوانات ولا أي بنأدمين والصمت مسيطر على المكان .. لا عشان المنطقة شاذة عن الطبيعة وكأنها ملهاش وجود على كوكب الأرض أصلًا.
وإتقال إن من ضمن البعثات الاستكشافيه كان في بعثة موجود فيها كلب مع أحد أفراد البعثة ، ومجرد ما دخل الكلب المنطقة فضل ينبح بطريقة غريبة جدًا ويبص حواليه في كل الإتجاهات بشكل جنوني كأنه شايف حاجه محدش غيره شايفها ، وبعد كده جرى بعيد واختفى وملوش أي أثر.
حكايات إتقالت عن منطقة حزام الصمت
لما تم استجواب عدد من الأهالي اللي ساكنين بالقرب من المنطقة كلهم أجمعوا على إنها منطقة غامضة ومرعبة ، وعشان كده بيطلقوا عليها "المنطقة المحرمة" أو الضائعة ؛ والبعض التاني قال إن موجود في نص المنطقه دي عرش إبليس.
وفي كلام كتير إتقال إن بعضهم شاف أطباق طائرة بتحوم في المنطقة ، وفي كلام تاني بيقول إن تم الاستحواذ على المنطقة من الكائنات الفضائية.
والأغرب من كل إللي إتقال ده إن بعض المستكشفين والباحثين اللي راحوا منطقة حزام الصمت تم ملاحظة عليهم علامات الإصابة بالصرع والهلوسة.
وبالرغم من إن العلماء حاولوا يوصلوا لتفسير علمي ومنطقي لكل الظواهر الغريبة اللي بتحصل في المنطقة ، ولكنهم مقدروش يوصلوا غير لفرضية ضعيفة وهي إن المكان متحاوط بطاقة مغناطيسية عالية جدًا بسبب الشهب والنيازك اللي سقطت في المكان ، وإن هو ده السبب لكل إللي بيحصل في المنطقة.
وفي كلام لنظرية تانية بتقول إن بسبب النيازك اللي وقعت في المنطقة عملت إشعاعات ضارة ، وده أدى لموت كل الحيوانات وكمان ده اللي خلى إن مفيش أي إشارة تليفون تكون موجودة في المكان.
إنما بقا النظرية التالتة ودي بقى اللي أخدت نسبه كبيرة من القوة والمنطقية عن كل كلام النظريات اللي فات ، والنظرية دي بتقول إن المنطقة بمثابة بوابة لمرور الكائنات الفضائية إلى عالمنا والفضائيين بيستعملوها لأغراضهم الخاصة.
وسبب قوة النظرية دي إن السكان اللي ساكنين بالقرب من المنطقة قالوا إن في أوقات بيعدي عليهم 3 أشخاص إمرأة و 2 رجاله شكلهم غريب لأنهم فائقين الجمال بطريقة مش عادية ، وكانوا بيطلبوا منهم مايه وبيعدوا عليهم بشكل منتظم وفي كل مرة مابيطلبوش غير مايه بس.
ولما سألوهم أهل القريه أنتوا جايين منين ؟ قالوا "جايين من فوق"! … وبالرغم من كده محدش قال أي نظرية فيهم هي الصح ، ولسه لحد دلوقتي العلماء ملاقوش أي تفسير.