كتبت : إيمان توفيق
لما تسمع كلمة محار البحر بييجي في بالك اللؤلؤ اللي موجود فيها ، بس هل سألت نفسك قبل كده إزاي اللؤلؤ ده بيتكون جوه محار البحر ؟
بص يا سيدي لما حبة رمل أو أي حاجة صغيرة تدخل جوه المحار وقتها المحار لازم يعمل رد فعل دفاعي عشان يحمي نفسه من الجسم الغريب ده ، فبيفرز علي الجسم ده مواد عضوية وغير عضوية علي شكل طبقات بتتحول مع الوقت للؤلؤ.
واللؤلؤ له بريق مميز في الضوء شكله حلو جداً ، وألوانه متعددة ما بين الأسود و ده لون نادر في اللؤلؤ وعشان كده تمنه غالي مقارنة بالأبيض وهو اللون الشائع والمنتشر في اللؤلؤ.
وفيه ألوان تانية زي البرتقالي والأصفر والوردي ومش دائماً شكله بيكون مدور أحياناً بيبقى شكله مش منتظم أو علي شكل الكمثري.
كمان اللؤلؤ هو الجوهرة الوحيدة اللي بتتشكل جوه أجسام الحيوانات ، و 95٪ من اللؤلؤ بيتكون في المياه العذبة عشان كده قيمته أقل من اللي بيتكون في المياه المالحة واللي بيكون أندر وأغلى في الثمن.
وقبل ما ينتشر استخدام اللؤلؤ في أول القرن العشرين كان تمنه غالي جداً و بيقتصر استخدامه علي النبلاء والأغنياء فقط ؛ و العلماء اكتشفوا حديثاً نتيجة الحفر في استراليا أقدم حبة لؤلؤ و اللي بلغ عمرها 2000 سنة.
طب هل الناس مستنيين يلاقوا اللؤلؤ ده بالصدفة عشان يستخدموه ؟
لأ، لأن حالياً في صناعة موجودة في الصين واليابان واستراليا لتحفيز المحار علي إنتاج اللؤلؤ وبتم الصناعة دي بإنهم بيدخلوا الجسم الغريب زي حبة الرمل أو غيرها جوه المحار وبيعتنوا بالمحار في أحواض في مزارع خاصة في بيئة مناسبة ويسيبوها لما اللؤلؤ يتكون.
إلا إن العملية دي ممكن تفشل بسبب الظروف السيئة زي الأمطار والرياح الباردة أو بسبب إهمال نظافة أحواض المحار او تلوثها بالمخلفات الصناعية واللي بتخلي المحار يموت قبل تكوين اللؤلؤ.