بقلم ايمان توفيق
طول ما احنا عايشين فبنكون دايما عايزين حاجات سواء في شغل أو صداقة أو حب ولما نكون بنتمني حاجة أوي فالطبيعي إن احنا بندعي بيها كتير و لو الحاجة دي اتأخرت بيدخل في قلوبنا غصب عننا سؤال ...
( ليه الحاجة دي ربنا مانعها عني؟! اللهم لا اعتراض أكيد لحكمة عنده بس أنا نفسي أعرف هي ليه مش بتيجي مع إني ليل نهار بدعي )
وبعد شوية وقت و صبر كتير تلاقي ربنا حققلك أمنيتك ورزقك بالحاجة اللي كان نفسك فيها فتطير من الفرحه وتحمد ربنا إنها أخيراً جت و بعد شوية وقت تبدأ ملامح الأذي بتاعها تظهر عليك ..
تبدأ نفسيتك تتدمر وحياتك تبوظ وملامحك تبهت وروحك تدبل و تكتشف مع الوقت إن الحاجة دي من أسوأ الحاجات اللي حصلتلك في حياتك ، وتقول ياريتني مادعيت بيها ربنا كان عالم إنها هتأذيني فكان بيبعدها عني بس أنا عشان اصراري عليها جابهالي.
وده بيخليك تتأكد إن مش كل اللي إنت متخيل انه حلو بيبقي حلو و إن إنت ممكن تكون هتموت علي فاكهة عشان شكلها حلو وريحتها حلوة مثلاً بس بعد ماتاكلها تلاقي طعمها مر أو وحش جداً وتندم.
فخليك عارف دايما إن لما ربنا بيبعد عنك حاجة فده عشان ممكن تكون مؤذية ليك بيحميك بحكمته و علمه فماتعافرش في حاجة ربنا باعدها عنك.
وماتخبطش علي باب ربنا قفله قدامك ودايما افتكر و إنت بتدعي بحاجة معينة إنك تقول يارب ارزقني بيها لو كانت خير ، وسيب الباقي علي ربنا لأنه سبحانه وتعالي أدري منك بالأحسن ليك.