كتبت أيه أبو النجا
كل شخص ليه أصل وفصل ، عمرك فكرت إن الأمثال الشعبية اللي بنقولها زيها زيك بالضبط.؟ ، وكل مثل منهم أصله حكاية ، مش مجرد جملة بتتقال تعبيرًا عن موقف حصل ، بس أنت اللي بتردد المثل وما جربتش تسأل إيه أصله.؟
دايمًا لما حد بيكون معروف عنه إن لو أتطلب منه حاجه بيتأخر في تنفيذها ، أو لو أنت وأصحابك بتفضلوا تتفقوا إن أنتوا تتجمعوا ، وتقعدو تأجلوا من اليوم لتانى ، واليومين بيجيبوا أسبوع والأسبوع بيجيب شهر ، و هنا بقى يحضر المثل اللي بيقول " موت يا حمار"
طب هو الحمار ذنبة إية إن يموت ، وإيه علاقته بالموضوع أساسًا ، و إشمعنا الحمار تحديدًا ؟ ، ليه مش الكلب أوالمعزه أو الفيل ، ما الحيوانات كتير.!
بس ده ما ينفعش عشان المثل ليه أصل ، وإتقال في الروايات إنه بيرجع أصلة لقصة حصلت ما بين حاكم وحمار.
بداية القصة لما الحاكم شاف الحمار داخل الجنينة عنده فأعطى أمر بقتله ، بس في واحد من الوزراء فضل يقنع الحاكم أن ده حيوان وما بيفهمش وما ينفعش تنفيذ حكم الإعدام فيه.
بس الحاكم رأسه ناشفه وصمم على رأيه عشان يحاسب الحمار على عدم إلتزامه بالقواعد الملكية ، فكان في راجل واقف وعرض على الحاكم أنه هيقوم بتعليم الحمار القواعد الملكية.
بس ده بشرط أن الحاكم يعطيله قصر يعيش فيه لمدة 10 سنين عشان يعلم الحمار ، والحاكم وافق واقتنع جدًا ، بس قاله إن هيقطع رقبته لو فشل إنه يعلم الحمار القواعد الملكية.
والراجل وافق وجرى بسرعة يقول لمراته على اللي حصل ، لكن هي سألته عن اللي هيعمله فيه الحاكم ؟ ، لأنه كده كده هيفشل في تعليم الحمار ، وكان رده عليها إنه بعد 10 سنين هيموت حد مننا إحنا التلاته ، يا إما هيموت السلطان ، أو أنا أموت أو الحمار هو اللي يموت.
ومن هنا بقي جات جُملة ( موت يا حمار ) ، والأجيال ورثتها من بعض خلال السنين من جيل للتانى لحد اليوم اللي إحنا فيه.