بقلم مي حمدين
أوقات بنحتاج حد يسمعنا من غير ما نتكلم..حد يبص في عنينا ويفهم اللى جوانا من غير ما نطلب دا..
أو يطبطب على روحنا من جوا ويطمنا ان كل دا هيعدى..حد يعمل أي حاجه عشان يستنى بس ابتسامتنا..
أوقات بنحتاج حد شبهنا في روحنا الحلوة اللى ديماً بتسعد اللى حواليها عشان يبقى عندها سبب تقدر تكمل عشانه..بنحتاج كلمة حلوة تجبر خاطرنا وأوقات حضن من حد بنحبه نطلع فيه كل الغضب اللى جوانا..
أوقات بنضعف أوي وبنحتاج لـ ايد تفضل ماسكة فينا بكل طاقتها وتقوينا.. ساعات بنضحك من كتر الوجع اللى جوانا وبنحتاج لحد يقولنا أنا معاك مش هسيبك..أوقات بنكون ماشين تايهين مش لاقين مكان نروح عليه في بنحتاج لـ حد يوجهنا ويفضل معانا..أوقات و أوقات وأوقات..
حاجات كتير في تفاصيلها بنحتاج حد دايم ومستمر معانا..عشان وجوده بيفرق جامد أوي مش بس في حياتنا لا دا بيفرق في كل حاجه حوالينا..
كل واحد فينا عنده حكاية جواه وصلته للمرحلة اللى هو فيها دلوقتى وكل دا بسبب قلبنا اللى ديماً بيخدعنا وبيخونا وبيتعلق جامد لدرجة تخلينا ضعاف..
احتياجنا لحد يقوينا دا مش ضعف بالعكس دا بيخلينا نفهم ونعرف قد اى وجودنا من غير الشخص دا شئ مستحيل ..
اختار الشخص الصح اللى متتكسفش تبان ضعيف قدامه لإنك عارف ومتأكد انك من غيره ولا حاجه.