كتبت أية أبو النجا
ما جاش في بالك إن ليه أي دور في التمثيل بتلاقي إن الممثلين الرجاله أكتر احتلال للدور الكوميدي من الممثلات.!
في دراسات كتير إتعملت عن السبب ورا إن الرجاله بتضحك و كوميدية أكتر من الستات ؛ لا وعندهم القدرة إن هما مش بيضحكوا شخص أو أتنين أو حتى 20 ، ده قادرين يضحكوا قبيله بحالها.
وده مش كلام استنتاج ، ده تأكيد على كل نتايج الدراسات اللي إتعملت عن الموضوع دة ، وده خلي مجموعه من الباحثين بجامعة ابيرستويث و جامعة كارولينا ، يقوموا بمراجعة كل الدراسات اللي إتعملت في كل أنحاء العالم ، وكانت النتيجة برضوا في ( صالح الرجالة ).
وعلى حسب كلام الدكتور" جيل جرينجروس " إن الفكاهة من الظواهر المعقدة اللي بتضم تأثيرات عاطفية وإجتماعيه ؛ و ده وصل لنتيجة بتقول إن الولاد بتتقبل إحساس الرفض عادي جداً ومتعايشين معاة ؛ يعني بيبقى محدش بيطيقه وعنده اقتناع تام إن مفيش في خفه ظلة.
إنما البنات دايماً بتكون ما بين دايرتين "خوف المخاطرة و الرفض" ، بمعنى إن البنت بتكون مش عاوزه تقول حاجه عشان الحكم عليها ما يكونش في النهاية إنها ما بتضحكش ودمها يلطش.
وقدروا الباحثين إنهم يقيموا القدرة دى عند الرجاله والستات بشكل أكتر موضوعيه ، وده كان من خلال دراسة أمريكية كانت عبارة عن رسومات كاريكاتورية ، وكان المطلوب منهم تعليق مُضحك على الرسومات ، و النتيجة كانت إن الستات بيحكموا العاطفة أكتر ، وتركيزهم كان في إنهم بيحددوا الأشياء اللي فيها إهانة على إنها غير مُضحكه.
زي مثلاً لو قولت :
" مره واحد مجنون راح سينما فكان مكتوب ممنوع دخول أقل من 14 ، راح جاب 13 واحد من أصحابه " ... نكته زي دي الرجالة هتضحك عادى ، إنما الستات خد عندك بقا هتشوفها من ناحية أنت بتتريق وبتتنمر على واحد مجنون وكمان بتستهزأ بمرضة ، وهو أحسن منك.
فكانت نتيجة الدراسة واضحه وضوح الشمس إن 63% من الرجاله حققوا درجه عالية في قدره روح الفكاهة عن الستات ؛ بس كل النتايج دى ما تعتبرش قاعدة أساسيه لأن القبول ده بتاع ربنا ، وكمان في ستات عندها حس كوميدي عالي.
وفي النهاية كل كلام الدراسات والعلماء مش معناه إن الرجاله كلها عندها القدرة علي الكوميديا ، لأن زي ما إحنا عارفين في ناس دمها تقيل.
اول مره اعرف المعلومة دي
ردحذف